R Ashwin is in discussions with CSK Ahead IPL 2025 : आयपीएलच्या पुढील हंगामाला अजून बराच कालावधी बाकी आहे, तरीही खेळाडू आणि फ्रँचायझींनी तयारी सुरू केली आहे. याच पार्श्वभूमीवर एक मोठी बातमी समोर येत आहे. अनुभवी ऑफ-स्पिनर रविचंद्रन अश्विनचा चेन्नई सुपर किंग्सवर नाराज असल्याची चर्चा आहे. सूत्रांनुसार, अश्विन सीएसके सोबतच्या आपल्या भविष्याबाबत चर्चा करत असून, तो फ्रँचायझीपासून वेगळा होण्याची शक्यता आहे.

रिटेंशनची मुदत आणि अश्विनची भूमिका –

खेळाडूंच्या रिटेंशनची अंतिम मुदत येण्यास अजून दोन महिने बाकी आहेत. अश्विन सीएसकेच्या वरिष्ठ अधिकाऱ्यांशी आपल्या भूमिकेबाबत बोलत असल्याचे समजते. आयपीएलच्या एका सूत्राने पीटीआयला सांगितले की, “कोणत्याही खेळाडूच्या भविष्याबाबत आता निर्णय घेणे घाईचे ठरेल. रिटेंशनची अंतिम मुदत जाहीर झालेली नाही, त्यामुळे अजून वेळ आहे. खेळाडूंशी बोलण्याची योजना नीलामीपूर्वीच होती आणि ज्येष्ठ खेळाडू म्हणून अश्विन यात सहभागी आहे. ही केवळ पुढील हंगामातील भूमिका स्पष्ट करण्यासाठीची परस्पर चर्चा आहे.”

अश्विन आणि सीएसके यांचा इतिहास –

38 वर्षीय अश्विनने गेल्या वर्षी आंतरराष्ट्रीय क्रिकेटमधून निवृत्ती जाहीर केली होती. 2025 च्या मेगा लिलावात सीएसकेने त्याला 9 कोटी 75 लाख रुपयांना खरेदी केले होते. चेन्नईचा रहिवासी असलेला अश्विन 2009 ते 2015 या काळात सीएसकेकडून खेळला होता. यंदाच्या आयपीएल हंगामात त्याने 9 सामन्यांत केवळ 7 विकेट्स घेतल्या. सीएसकेसाठी हा हंगाम निराशाजनक ठरला, कारण संघाने 14 सामन्यांत फक्त 4 विजय मिळवले आणि 10 पराभव पत्करले, ज्यामुळे ते गुणतक्त्यात 10व्या स्थानावर राहिले.

हेही वाचा – Jasprit Bumrah : ‘त्याने किती कष्ट सोसलं माहित आहे का…’, हर्षा भोगलेंनी बुमराहवर टीकाकारांना सुनावलं

संजू सॅमसनबाबतही चर्चा –

दुसरीकडे, राजस्थान रॉयल्सचा कर्णधार संजू सॅमसन याच्याबाबतही अटकळी सुरू आहेत. काही माध्यमांनुसार, सॅमसनने राजस्थान रॉयल्सपासून वेगळे होण्याचा निर्णय घेतला असून, त्याने फ्रँचायझीला रिलीज करण्याची विनंती केली आहे. सॅमसनला रिटेन करायचे की रिलीज करायचे, याबाबत राजस्थानने अद्याप कोणताही निर्णय घेतलेला नाही. काही अटकळींनुसार, सीएसके सॅमसनला आपल्या संघात सामील करू शकते.आयपीएल 2026 च्या हंगामापूर्वी रिटेंशन आणि नीलामीच्या चर्चा जोरात सुरू आहेत. अश्विन आणि सॅमसन यांच्या भविष्याबाबत येत्या काही आठवड्यांत स्पष्टता येण्याची शक्यता आहे.