Pune ZP Election – पुणे जिल्हा परिषद व पंचायत समितीसाठी मतदान प्रक्रिया पार पडत असताना शिरूर तालुक्यातील खैरेवाडी येथे मतदारांचा अभूतपूर्व उत्साह पाहायला मिळाला. केंदूर-पाबळ जिल्हा परिषद गटातील या छोट्याशा गावामध्ये अधिकृत वेळ संपल्यानंतरही चक्क रात्री साडेसात वाजेपर्यंत मतदान सुरू होते.

सायंकाळी साडेपाच वाजता केंद्राचे प्रवेशद्वार बंद केले तेव्हा शंभरहून अधिक मतदार रांगेत उभे असल्याने प्रशासनाला अंधारातही ही प्रक्रिया सुरू ठेवावी लागली.खैरेवाडी गावात एकूण १००९ मतदार असून येथे जिल्हा परिषदेसाठी राष्ट्रवादीचे प्रफुल्ल शिवले व भाजपचे विकास गायकवाड, तर पंचायत समितीसाठी राष्ट्रवादीच्या वंदना पवार व भाजपचे दीपक खैरे यांच्यात अटीतटीची लढत होत आहे.

सायंकाळी मतदान केंद्राचे गेट बंद केल्यानंतर जे मतदार आत होते, त्यांना मतदानाची संधी देण्यात आली. बराच वेळ रांगेत उभे राहावे लागल्याने काही मतदारांनी खाली बसून आराम केला. प्रशासनाच्या वतीने या ठिकाणी तात्पुरत्या स्वरूपात विजेची व्यवस्था करण्यात आली होती.

शिक्रापूरचे पोलीस उपनिरीक्षक सोमनाथ कचरे यांनी या ठिकाणी विशेष लक्ष देऊन चोख पोलीस बंदोबस्त तैनात केला होता. अखेर रात्री साडेसात वाजेपर्यंत ७९५ मतदारांनी आपला हक्क बजावला. या गावात एकूण ७८.७९ टक्के इतके भरघोस मतदान झाले असून संपूर्ण प्रक्रिया अत्यंत उत्साहात आणि शांततेत पार पडली आहे. रात्री उशिरापर्यंत चाललेल्या या मतदानामुळे खैरेवाडीची सर्वत्र चर्चा सुरू आहे.