प्रभात वृत्तसेवा पुणे – सावित्रीबाई फुले पुणे विद्यापीठाची राष्ट्रीय संस्थात्मक मानांकन आराखड्यातील (एनआयआरएफ ) स्थान घसरल्याचे तीव्र पडसाद येत्या मंगळवारी होणाऱ्या अधिसभेत (सिनेट) उमटणार आहेत. याच विषयावर अधिसभा सदस्य प्रशासनास धारेवर धरणार आहेत. घसरणीच्या चौकशीसाठी तज्ज्ञांची समिती नेमण्याचा ठरावही मांडण्यात आल्याने ही बैठक वादळी होण्याची चिन्हे आहेत.मागील वर्षी देशातील सर्वोत्कृष्ट विद्यापीठांच्या यादीत ३७ वे स्थान मिळवणाऱ्या विद्यापीठाची यंदा ९१ व्या स्थानावर झालेली घसरण शिक्षण वर्तुळात आणि विद्यार्थी संघटनांमध्ये चिंतेचा विषय ठरली आहे. प्रशासनाने प्राध्यापकांची कमतरता हे घसरणीमागील प्रमुख कारण असल्याचे स्पष्टीकरण दिले असले तरी, यास विद्यापीठाचा नियोजनशून्य कारभारच जबाबदार असल्याचा आरोप विद्यार्थी संघटनांनी केला आहे. आता हाच मुद्दा अधिसभा सदस्यांनी उचलून धरला असून, प्रशासनाकडून सविस्तर स्पष्टीकरण मागितले आहे.अधिसभा सदस्य डॉ. अर्पणा लळिंगकर, दादाभाऊ शिनलकर, राहुल पाखरे यांच्यासह अनेक सदस्यांनी यावर प्रस्ताव सादर केले आहेत. विद्यापीठाची आंतरराष्ट्रीय स्तरावर जी ओळख आहे, तिला मानांकनामुळे धक्का बसला आहे. नेमक्या कोणत्या कारणांमुळे घसरण झाली, हे समजून घेणे आवश्यक आहे, अशी भूमिका सदस्यांची आहे. डॉ. लळिंगकर यांच्या ठरावात एक संशोधन समिती तातडीने स्थापून तिने चार महिन्यांत अहवाल सादर करावा. त्यांच्या शिफारशींची त्वरित अंमलबजावणी करावी, अशी मागणी केली आहे. समितीत आयआयटीसारख्या नामांकित संस्थांमधील तज्ज्ञांचा समावेश असावा, असे शिनलकर यांनी ठरावात नमूद केले आहे. विद्यापीठ अनुदान आयोगाने विद्यार्थ्यांना एकाच वेळी नियमित आणि दूरस्थ अशा दोन्ही पद्धतींनी शिक्षण घेण्याची मुभा दिली आहे. मात्र, विद्यापीठाच्या दूरस्थ व ऑनलाइन शिक्षण केंद्रात प्रवेशासाठी मूळ शाळा सोडल्याचा दाखला (टीसी व एलसी) मागितला जातो. यामुळे नियमित अभ्यासक्रमाच्या विद्यार्थ्यांना अडचण येते. ही अट रद्द करावी, असा ठराव अधिसभा सदस्य युवराज नरवडे यांनी मांडला आहे. राज्य शासनाने मुलींना मोफत शिक्षण देण्याचा निर्णय घेतला असला तरी, अनेक महाविद्यालयांमध्ये त्याची अंमलबजावणी होत नसल्याचे समोर आले आहे. या महाविद्यालयांवर अंकुश ठेवण्यासाठी आणि योजनेचा लाभ प्रत्येक विद्यार्थिनीपर्यंत पोहोचवण्यासाठी विद्यापीठाने ठोस पावले उचलावीत, असा ठराव ॲड. ईशानी जोशी यांनी मांडला आहे.
