पुणे : सर्वसामान्य नागरिकांना रुग्णालयात उपचार मिळणे, हा त्यांचा अधिकार आहे. गर्भवती महिलेच्या मृत्यू प्रकरणात नेमकी काय चूक झाली आहे. हे सरकार तपासणार आहे. दीनानाथ मंगेशकर रुग्णालयातील डॉक्टरांनी चूक केली असेल तर, या चुकीला माफी नाही. दोषी असणाऱ्यांवर गुन्हे दाखल करून त्यांच्यावर कठोर कारवाई करण्यात येणार असल्याचे महसूलमंत्री चंद्रशेखर बावनकुळे यांनी सांगितले. बालेवाडी येथे महसुलमंत्री बावनकुळे यांनी माध्यमांशी संवाद साधला. त्यावेळी ते बोलत होते. यावेळी ते म्हणाले की, ही अतिशय गंभीर घटना आहे. याबद्दल सर्वसामान्य नागरिकांच्या मनात प्रचंड संताप आहे. या घटनेची राज्य शासनाने गंभीर दखल घेतली आहे. अशा घटना सहन करणार नाही. तसेच, पुण्याच्या जिल्हाधिकारी यांच्याशी याबाबत बोललो आहे. या रुग्णालयाला अनेक सोईसुविधा राज्य शासनाने दिलेल्या आहेत. त्यामुळे या रुग्णालयासह इतर कुठल्याही रुग्णालयाची मुजोरी सरकार सहन करणार नाही. गर्भवती महिलेच्या मृत्यू प्रकरणातील जबाबदार व्यक्तीला तसेच या प्रकरणातील संबंधित रुग्णालय प्राशसकीय अधिकाऱ्यांना माफ केले जाणार नाही. या प्रकरणामध्ये ज्या लोकांची चूक आहे, अशा सर्वांवर कारवाई होईल, असेही बावनकुळे यांनी यावेळी सांगितले. इतर राज्याप्रमाणे महाराष्ट्रात सत्ताधारी व विरोधी पक्ष यांच्यात काहीही वैर नाही महाराष्ट्रात विरोधी व सत्ताधारी विकास कामासाठी एकत्र बसतात चर्चा करतात. त्यामुळे आशिष शेलार व विजय वडेट्टीवार यांची भेट ही महाराष्ट्राची संस्कृती दर्शवणारी आहे. वडेट्टीवार भाजपमध्ये येणार असे वक्तव्य करून कोणाच्या राजकीय आयुष्यावर विनाकारण भाष्य करू नये, असेही महसूलमंत्री व भाजपचे प्रदेशाध्यक्ष बावनकुळे यांनी सांगितले.
