पुणे : अयोध्या येथील श्रीराम जन्मभूमी न्यासाचे कोषाध्यक्ष परमपूज्य स्वामी श्री गोविंददेव गिरी महाराज यांना ‘सूर्यदत्त सूर्यरत्न राष्ट्रीय जीवनगौरव पुरस्कार – द मॉडर्न सेंट ऑफ इंडिया’ देऊन शनिवारी सन्मानित करण्यात आले. इंद्रायणी तीरावर तीर्थक्षेत्र आळंदी येथे सूर्यदत्त एज्युकेशन फाउंडेशन संचालित सूर्यदत्त ग्रुप ऑफ इन्स्टिट्यूटच्या २६ व्या वर्धानपनदिनानिमित्त ‘सूर्यदत्त’तर्फे हा पुरस्कार सन्मानपूर्वक प्रदान करण्यात आला.

जगभर वेद आणि भारतीय प्राचीन संस्कृतीचा प्रसार करण्यात स्वामी गोविंददेव गिरी महाराज यांनी दिलेल्या उल्लेखनीय योगदानाबद्दल ‘सूर्यदत्त’च्या वतीने मानचिन्ह, सन्मानपत्र, भगवतगीता देऊन त्यांचा सन्मान करण्यात आला. ‘सूर्यदत्त’चे संस्थापक अध्यक्ष प्रा. डॉ. संजय बी. चोरडिया व उपाध्यक्षा सुषमा चोरडिया यांच्या हस्ते हा पुरस्कार स्वामीजींना प्रदान करण्यात आला. यावेळी एमआयटी शिक्षण संस्थेचे संस्थापक अध्यक्ष प्रा. डॉ. विश्वनाथ कराड, आचार्य राजेंद्र दास, आचार्य अभय दास हेही उपस्थित होते.

‘सूर्यदत्त’च्या सहयोगी उपाध्यक्षा स्नेहल नवलखा, डॉ. किमया गांधी, मुख्य संचालन अधिकारी अक्षित कुशल, संचालक (सीएसआर) प्रशांत पितालिया, रोशनी जैन, नयना गोडांबे, रोहित संचेती, मारुती मारेकरी व नितीन आदी उपस्थित होते. हजारो विद्यार्थ्यांनी गीता पठण करत, मृदंग वादनाच्या सानिध्यात हा पुरस्कार प्रदान सोहळा रंगला.

प्रा. डॉ. संजय बी. चोरडिया यांनी यावेळी पुरस्कार प्रदान करण्यामागील भूमिका मांडली. देशासाठी स्वामीजींचे कार्य महान असून, अध्यात्मिक व सांस्कृतिक प्रगतीमध्ये त्यांनी केलेले कार्य समाजासाठी दिशादर्शक आहे. श्रीराम मंदिराच्या उभारणीत महाराजांनी दिलेले योगदान उल्लेखनीय आहे. त्यांच्या कार्याचा गौरव करताना सूर्यदत्त परिवाराला त्यांचा आशीर्वाद मिळाल्याची भावना आम्हा सर्वांच्या मनात आहे. त्यांच्या आशीर्वादाने आणि कार्यातून प्रेरणा घेऊन सूर्यदत्त संस्था पुढील काळात आणखी जोमाने देशहिताचे कार्य उभारेल, असा विश्वास त्यांनी व्यक्त केला.

स्वामी गोविंददेव गिरी महाराज यांनी पुरस्काराचा स्वीकार करत सूर्यदत्त संस्थेच्या कार्याला आशीर्वाद दिले. भारतीय संस्कृती, परंपरा महान असून, भविष्यात संपूर्ण जगाचे नेतृत्व करण्याची क्षमता भारतामध्ये आहे. आपली मूल्ये, संस्कृती भावी पिढीने जपायला हवीत. त्यातूनच एका आदर्श पिढीचे निर्माण होणार आहे. ‘सूर्यदत्त’सारख्या शिक्षण संस्था विद्यार्थ्यांमध्ये संस्काराची बीजे पेरत आहेत, याचा आनंद वाटतो, अशी भावना महाराजांनी व्यक्त केली.