पुणे – राज्याचे उच्च व तंत्रशिक्षणमंत्री चंद्रकांत पाटील यांच्या माध्यमातून कोथरुड मधील रुग्णांना मोठा दिलासा मिळाला आहे. मुख्यमंत्री वैद्यकीय सहाय्यता निधीमधून कोट्यावधींची मदत कोथरुड विधानसभा मतदारसंघातील रुग्णांना झाली आहे. राज्यातील एकही सर्वसामान्य व गोरगरीब गरजू रुग्ण पैशाअभावी उपचाराविना राहणार नाही, यासाठी मुख्यमंत्री वैद्यकीय सहाय्यता कक्षाच्या माध्यमातून मदत गरजू रुग्णांसाठी आर्थिक मदत उपलब्ध करुन दिली जाते.

या व्यवस्थेमुळे लाखो रुग्णांना संजीवनी मिळाली असून, कोथरुड विधानसभा मतदारसंघातील गरजू रुग्णांना याचा जास्तीतजास्त लाभ व्हावा; यासाठी आपल्या विधानसभा मतदारसंघातील जनसंपर्क कार्यालयात विशेष कक्ष स्थापन करण्यात आला आहे.‌ या कक्षाने वेळोवेळी पाठपुरावा करुन कोथरुड मधील असंख्य रुग्णांवर उपचारासाठी निधी उपलब्ध करून दिला आहे.‌ या कक्षाच्या माध्यमातून आतापर्यंत ४ कोटी ४२ लाख ७० हजार २५० इतका निधी कोथरूड मधील रुग्णांना उपलब्ध झाला असून, दुर्धर आजारावर उपचार करण्यात आले आहेत.