Pune Solapur Highway Traffic – पुणे-सोलापूर राष्ट्रीय महामार्गावरील वाढती वाहतूक कोंडी, सातत्याने होणारे अपघात आणि रखडलेली विकासकामे यामुळे नागरिकांमध्ये तीव्र संतापाची भावना निर्माण झाली आहे. हडपसर, मांजरी, लोणी काळभोर, कदमवाकवस्ती आणि उरुळी कांचन परिसरातून दररोज प्रवास करणार्‍या हजारो नागरिकांना तासनतास कोंडीत अडकून प्रवास करावा लागत असून, या गंभीर समस्येकडे लोकप्रतिनिधी दुर्लक्ष करत असल्याचा आरोप नागरिकांकडून केला जात आहे.

पुणे-सोलापूर महामार्गावरील अर्धवट उड्डाणपूल, सेवा रस्त्यांची दुरवस्था, अतिक्रमणे, चुकीचे पार्किंग आणि रखडलेली कामे यामुळे परिस्थिती दिवसेंदिवस बिकट होत चालली आहे. सकाळ आणि संध्याकाळच्या वेळेत वाहनांच्या लांबच लांब रांगा लागत असून, अनेकदा रुग्णवाहिकाही वाहतूक कोंडीत अडकून पडत आहेत. यामुळे रुग्णांचे जीव धोक्यात येत असल्याची भीती नागरिकांनी व्यक्त केली आहे.

महामार्गावरील समस्यांवर कायमस्वरूपी उपाययोजना करण्यासाठी राष्ट्रीय महामार्ग प्राधिकरण, वाहतूक पोलीस, सार्वजनिक बांधकाम विभाग आणि प्रशासन यांची संयुक्त बैठक घेऊन ठोस आराखडा जाहीर करण्याची मागणी नागरिकांनी केली आहे. अन्यथा तीव्र जनआंदोलन उभारण्यात येईल, असा इशाराही स्थानिकांनी दिला आहे.

अपघातांची मालिका; नागरिक भयभीत
स्थानिक नागरिकांच्या म्हणण्यानुसार, दररोज होणार्‍या अपघातांमुळे अनेकांना कायमस्वरूपी दुखापती होत आहेत, तर काही कुटुंबांवर दुःखाचा डोंगर कोसळला आहे. नोकरदार वर्ग उशिरा कामावर पोहोचत असून, विद्यार्थ्यांचे शैक्षणिक नुकसान होत आहे. व्यापार्‍यांनाही वाहतूक कोंडीचा मोठा आर्थिक फटका बसत असल्याचे चित्र आहे.

तर जनता मोकळा श्वास घेईल
दररोजच्या वाहतूक कोंडीमुळे नोकरदार, विद्यार्थी, व्यापारी आणि रुग्णवाहिका यांना मोठा फटका बसत आहे. पुणे-सोलापूर महामार्गाच्या समस्या सोडविण्यासाठी प्रशासन आणि लोकप्रतिनिधींनी तातडीने पुढाकार घ्यावा, अशी मागणी नागरिकांकडून होत आहे.