Pune Solapur Highway – पुणे-सोलापूर महामार्ग या प्रमुख मार्गावर शेवाळेवाडी जवळ सांडपाण्यामुळे घाणीचे साम्राज्य निर्माण झाले आहे. दररोज लाखो नागरिकांना सांडपाण्यातून मार्ग काढत प्रवास करावा लागत आहे. गटारातील घाण पाणी थेट रस्त्यावर येत असल्याने नागरिकांच्या आरोग्यावर गंभीर परिणाम होण्याची भीती व्यक्त केली जात आहे. या साचलेल्या पाण्यातून दररोज हजारो वाहने जात असून पाणी उडून पादचारी व दुचाकीस्वारांच्या अंगावर पडत आहे. शेवाळेवाडी फाटा ते शेवाळेवाडी येथील पीएमपीएमएलच्या आगारापर्यंत नागरिकांना घाण पाण्यातूनच मार्ग काढावा लागत आहे. या परिसरात रुग्णालय, बँक, गृहनिर्माण संस्था, दुकाने तसेच मोठे बस आगार असूनही प्रशासनाचे दुर्लक्ष होत असल्याची तक्रार स्थानिकांनी केली आहे. गटार वाहिनीतून दररोज हजारो लिटर घाण पाणी कक्षातून वर येऊन थेट महामार्गावर पसरत आहे. त्यामुळे परिसरात तीव्र दुर्गंधी पसरली असून आरोग्याचा गंभीर प्रश्न निर्माण झाला आहे. याबाबत पुणे शहर भारतीय जनता पक्षाचे सरचिटणीस राहुल शेवाळे यांनी सांगितले की, पुणे महानगरपालिका कार्यालयात वेळोवेळी पत्रव्यवहार करण्यात आला आहे. सुमारे नऊ कोटी रुपयांची लक्ष्मी वसाहत ते कवडीपाट टोलनाका दरम्यान नवीन गटार वाहिनी योजनेला मंजुरी मिळाली असून लवकरच कामास सुरुवात होणार आहे. दि. 18 ऑक्टोबर 2025 रोजी महापालिकेचे आयुक्त नवलकिशोर राम यांनी शेवाळेवाडी परिसराला भेट देऊन तुंबलेली गटारे व वाहिन्या स्वच्छ करण्याच्या सूचना अधिकार्यांना दिल्या होत्या. काही ठिकाणी स्वच्छता करण्यात आली असली तरी जुन्या वाहिन्यांमुळे पाणी तुंबून रस्त्यावर येत आहे. नागरिकांच्या आरोग्याचा प्रश्न तातडीने सोडवावा, अशी मागणी राहुल शेवाळे यांनी केली आहे.
