Pune : दिवाळीतील लक्ष्मीपूजनानिमित्त सारसबाग येथील श्री महालक्ष्मी देवीला १६ किलो सोन्याची साडी आणि सुमारे २ किलो सोन्याचा रत्नजडित मुकुट परिधान करण्यात आला. सुवर्णवस्त्रांनी सजलेले देवीचे हे आकर्षक रूप पाहण्यासाठी भाविकांनी मंदिरात मोठी गर्दी केली.

श्री महालक्ष्मी मंदिरात वर्षातून दोन वेळा, दसरा आणि लक्ष्मीपूजनाच्या दिवशी देवीला ही सुवर्णसाडी नेसवली जाते. या परंपरेनुसार लक्ष्मीपूजनाच्या दिवशी देवीला सोन्याची साडी आणि रत्नजडित मुकुट परिधान करण्यात आला.

दिवाळीनिमित्त मंदिराचे प्रवेशद्वार, सभामंडप आणि संपूर्ण परिसरात आकर्षक सजावट करण्यात आली आहे. रोषणाई आणि सजावटीमुळे मंदिर परिसरात उत्सवी वातावरण निर्माण झाले आहे.

ट्रस्टचे प्रमुख संस्थापक आणि विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त ॲड. प्रताप परदेशी, उत्सवप्रमुख डॉ. तृप्ती अग्रवाल, भरत अग्रवाल, प्रवीण चोरबेले, हेमंत अर्नाळकर, नारायण काबरा, राजेश सांकला, रमेश पटोदिया, राजकुमार चमडीया आणि निलेश लद्दड यांच्यासह पदाधिकारी व कार्यकर्त्यांनी या आयोजनासाठी पुढाकार घेतला.

प्रमुख विश्वस्त अमिता अग्रवाल यांनी सांगितले की, या सोन्याच्या साडीची निर्मिती हैदराबाद येथे करण्यात आली आहे. साडीवरील कलाकुसरीसाठी सुमारे सहा महिने लागले. आकर्षक नक्षीकाम आणि सुबक रचनेमुळे ही साडी विशेष ठरते. तसेच सुमारे दोन किलो सोन्यापासून तयार केलेल्या मुकुटावरही अत्यंत बारीक आणि सुंदर नक्षीकाम करण्यात आले आहे.

पारंपरिक धार्मिक संकल्पना, सोन्यावरील कलाकुसर आणि कलात्मक सौंदर्य यांचा संगम या मुकुटात पाहायला मिळतो. दसरा आणि लक्ष्मीपूजन या दोन्ही दिवशी देवीचे हे सुवर्णरूप भाविकांसाठी विशेष आकर्षण ठरते. यंदाही देवीच्या दर्शनासाठी पुणेकरांनी मोठी गर्दी केली.