स्वारगेट, शिवाजीनगर बसस्थानकासह पुणे रेल्वे स्थानक गजबजले
Crowd of passengers: दिवाळीला आपल्या मूळ गावी जाणाऱ्या चाकरमानी, विद्यार्थी आणि व्यावसायिकांची दोन दिवसांपासून रेल्वे आणि एसटी बसस्थानकांवर प्रवाशांची गर्दी उसळली आहे.

रविवारी सकाळीही स्वारगेट, शिवाजीनगर (वाकडेवाडी) बसस्थानक आणि पुणे रेल्वे स्थानक परिसर वर्दळीने गजबजून गेला आहे.

शिक्षण, नोकरी आणि व्यवसायानिमित्त राज्याच्या विविध भागांतून, तसेच परराज्यांतून नागरिक पुणे शहरात येतात. दिवाळीत सर्वांनाच घराची ओढ लागते. त्यामुळे बंगळुरू, दिल्ली, मुंबई, सोलापूर, कोल्हापूर, नागपूर, नाशिक या मार्गांवरील रेल्वे गाड्यांना मोठी गर्दी होत आहे. स्थानकावरील फलाट, तिकीट खिडक्या, प्रवेशद्वारे आणि प्रतीक्षालयात प्रवाशांची लगबग दिसून आली. त्यामुळे स्थानकाला यात्रेचे स्वरूप आले होते.

स्वारगेट, शिवाजीनगर एसटी बसस्थानकांवरही सातारा, सांगली, कोल्हापूर, सोलापूर, अहिल्यानगर, नाशिक आणि मराठवाड्याकडे जाणाऱ्या प्रवाशांची संख्या अधिक होती. बसमध्ये जागा मिळवण्यासाठी आणि बस पकडण्यासाठी प्रवाशांची धावपळ सुरू होती.

अनेक कुटुंबे लहान मुले आणि ज्येष्ठ नागरिकांसह फराळाचे साहित्य व मोठ्या बॅगा घेऊन वेळेपूर्वीच स्थानकांवर दाखल होत होते. खासगी वाहनांमुळे शहरातून बाहेर पडणाऱ्या प्रमुख रस्त्यांवरही वाहनांची मोठी कोंडी पाहायला मिळाली.

रेल्वेकडून प्रवाशांसाठी ४०० हून अधिक विशेष गाड्या सोडण्यात आल्या आहेत. त्यामुळे प्रवाशांनी गाडीची माहिती आधीच तपासून आणि पुरेसा वेळ राखून स्थानकावर यावे, तसेच प्रवासादरम्यान रेल्वे कर्मचाऱ्यांच्या सूचनांचे पालन करून सहकार्य करावे
– हेमंतकुमार बेहेरा, वाणिज्य व्यवस्थापक, पुणे रेल्वे विभाग

दिवाळीनिमित्त गावी जाणाऱ्या प्रवाशांची गर्दी लक्षात घेऊन नियमित बससह जादा बसचे नियोजन करण्यात आले आहे. मात्र, दोन दिवसांत प्रवाशांची मोठी गर्दी वाढली आहे. प्रवाशांची गैरसोय होणार नाही, असा पद्धतीने नियोजन करण्यात आले आहे.
– कमलेश धनराळे, विभागीय वाहतूक अधिकारी