diwali puja: दिवाळीतील महत्त्वाचा दिवस म्हणून व्यापारी, व्यावसायिक, सामान्यांच्या दृष्टीने लक्ष्मीपूजनाचे महत्त्व मोठे आहे.

यंदा नरकचतुर्दशी आणि लक्ष्मीपूजन एकाच दिवशी आल्याने सकाळी नरकचतुर्दशी आणि सायंकाळी लक्ष्मीपूजन शहरभर उत्साहाने साजरे करण्यात आले. सकाळी, सायंकाळी मोठ्या प्रमाणात फटाके फोडण्यात आले, आतषबाजी करण्यात आली.

नरकासुराचा वध करून श्रीकृष्णाने १६ हजार १०८ स्त्रियांना बंदीवासातून या दिवशीच मुक्त केले. याच दिवशी बळीराजाचे सगळे राज्य वामन अवतार घेऊन विष्णुने मिळवले आणि बळीराजाला पाताळात पाठवले. अशा अनेक आख्यायिका नरकचतुर्दशीच्या दिवसाशी जोडल्या आहेत.

शरद ऋतूचा शेवट आणि हेमंत ऋतूचे आगमन असा संक्रमणकाळ बाधू नये यासाठी, तसेच येणाऱ्या थंडीच्या काळासाठी तेल लावून स्नान करण्याची सुरुवात नरक चतुर्दशीच्या अभ्यंगस्नानापासून होते. पहाटे लवकर उठून अभ्यंगस्नान करून पुरुषांना सुहासिनींनी औक्षण केले.

राज्यात अनेक घरांमध्ये कारिट जमिनीवर ठेवून ते पायाने फोडण्यात आले. नरकासुराच्या वधाचे ते प्रतीक समजले जाते. काही ठिकाणी डाव्या पायाने, तर काही ठिकाणी उजव्या पायाच्या टाचेने कारिट चिरडण्याची पद्धत आहे. ही परंपरा प्रत्येक कुटुंबात वेगळी असू शकते. ते फोडल्यानंतर त्याचा रस जिभेला लावण्यात आला.  diwali puja: 

कारिटाची कडू चव आणि कठीण साल यांची तुलना नरकासुराच्या दुष्ट प्रवृत्तीशी केली जाते. त्यामुळे कारिट फोडणे म्हणजे वाईट विचार, अहंकार आणि नकारात्मकतेचा नाश करून चांगुलपणाचा स्वीकार करण्याचा सांकेतिक अर्थ आहे. काही ठिकाणी कारिट फोडताना गोविंदा गोपाळा असा जयघोषही करण्यात आला.

सायंकाळी साडेपाचनंतर लक्ष्मीपूजनाची तयारी करण्यात आली. पाच वाजून ५० मिनिटांपासून ते रात्री साडेदहा पर्यंत लक्ष्मीपूजनाचा मुहूर्त होता. व्यापाऱ्यांनी आणि घरोघरी लक्ष्मीपूजन उत्साहात पार पडले. व्यापाऱ्यांनी त्यांच्या दुकानांमध्ये लक्ष्मी, विष्णू आणि गणपतीची पूजा केली. असा समज आहे की लक्ष्मी या दिवशी पृथ्वीतलावर येऊन आपल्या भक्तांच्या घरात, धन, समृद्धी आणि सौख्याचा वर्षाव करते.

घरातून दारिद्र्य, अलक्ष्मी घालवून टाकणारी केरसुणी ही देवी स्वरूप मानली जाते. त्यामुळे या दिवशी तिचे महत्व विशेष आहे. लक्ष्मीस्वरूप केरसुणीचीही पूजा आज करण्यात आली.diwali puja: