पुणे: रक्षाबंधनाच्या पवित्र सणानिमित्त वडगाव बुद्रुक येथे स्वच्छता विभागातील महिला कर्मचाऱ्यांचा सन्मान करताना भावनिक क्षणांचा पूर उसळला. शहराच्या स्वच्छतेसाठी अहोरात्र झटणाऱ्या या कर्मचारी महिलांनी माजी नगरसेवक हरिदास चरवड यांना राखी बांधून भाऊ-बहिणीचे नाते जोडले. या प्रसंगी चरवड यांनी हृदयस्पर्शी कविता सादर केली  –

“माणसांच्या गर्दीत हरवून बसला माझा भाऊ,
सांग ना दादा, तुला भेटायला कोणत्या पत्यावर येऊ…”

ही कविता उपस्थितांच्या डोळ्यांत अश्रू आणणारी ठरली. या कवितेतून त्यांनी भाऊ-बहिणीच्या नात्यातील माया, जिव्हाळा आणि एकाकीपणाचे हळवे भाव शब्दबद्ध केले. कार्यक्रमात बोलताना हरिदास चरवड म्हणाले, “मी तुमचा मोठा भाऊ आहे. तुम्ही शहराच्या स्वच्छतेसाठी करत असलेल्या अमूल्य सेवेसाठी मी नेहमी तुमच्या पाठीशी राहीन.” या शब्दांनी उपस्थित कर्मचाऱ्यांच्या मनाला स्पर्श केला.

या अनोख्या रक्षाबंधन सोहळ्याला रा.स्व. संघाचे हेमंत गद्रे, जयंत तारगुंडे, रामभाऊ काळे, स्वामी आवटे, संदीप चरवड, भाजप युवा मोर्चाचे सारंग नवले, वैशाली जाधव, तसेच सिंहगड रोड क्षेत्रीय कार्यालयाचे आरोग्य निरीक्षक विनय थोपटे, मोकादम अशोक साठे, केदार जाधव, आकाश लोणारे, साईप्रसाद मोरे, दिग्विजय चरवड यांच्यासह अनेक मान्यवर उपस्थित होते.

कार्यक्रमाचे सूत्रसंचालन साईप्रसाद मोरे यांनी केले, तर विश्वजीत चरवड यांनी सर्वांचे आभार मानले. हा सोहळा केवळ रक्षाबंधनाचा सण न राहता स्वच्छता कर्मचाऱ्यांच्या सन्मानाचे, मानवी संवेदनांचे आणि नात्यांचे प्रतीक ठरला. शहराच्या स्वच्छतेसाठी अविरत झटणाऱ्या या कर्मचाऱ्यांच्या कार्याला सलाम करणारा हा कार्यक्रम सर्वांसाठी अविस्मरणीय ठरला.