Pune Gramin : नसरापूर परिसराला हादरवून सोडणाऱ्या एका अत्यंत संवेदनशील आणि क्लिष्ट गुन्ह्याची उकल करत पुणे ग्रामीण (Pune Gramin) स्थानिक गुन्हे शाखेचे पोलीस हवालदार गणेश मधुकर धनवे यांनी खाकी वर्दीची शान वाढवणारी कामगिरी केली आहे.

राजगड पोलीस ठाण्याच्या हद्दीत भारतीय न्याय संहिता (BNS) तसेच बालकांचे लैंगिक अपराधांपासून संरक्षण (POCSO) कायद्यान्वये दाखल झालेल्या गुन्ह्यात सुरुवातीला तपासाचे धागेदोरे अत्यंत धूसर होते. मात्र, कोणतीही चूक न करता गुन्हेगाराच्या मुळाशी (Pune Gramin) पोहोचत न्यायालयात गुन्हा सिद्ध करण्याजोगे ठोस पुरावे उभे करण्याचे अत्यंत आव्हानात्मक काम गणेश धनवे यांनी कौशल्याने फत्ते केले.

मुळशी तालुक्यातील दारवली गावचे सुपुत्र असलेल्या हवालदार गणेश धनवे (ब.नं. २४०२) यांच्या या उत्कृष्ट कार्यशैलीची थेट राज्यस्तरावर दखल घेण्यात आली. जुलै २०२६ या महिन्यासाठी जाहीर झालेल्या राज्यस्तरीय ‘सर्वोत्कृष्ट अपराधसिद्धी’ पुरस्कारावर त्यांनी आपले नाव कोरले. मुंबई येथे महाराष्ट्र राज्याचे पोलीस महासंचालक सदानंद दाते यांच्या हस्ते धनवे यांना सन्मानपूर्वक प्रशस्तीपत्र देऊन गौरविण्यात आले.

एका गुंतागुंतीच्या गुन्ह्यात पीडितेला न्याय मिळवून देत गुन्हेगाराला शिक्षेपर्यंत पोहोचवणाऱ्या धनवे यांच्या तपास कौशल्याची प्रशंसा करत, भविष्यातही गुन्हेगारी जगतावर असाच वचक निर्माण करत कर्तव्य बजावण्याची अपेक्षा (Pune Gramin) पोलीस महासंचालकांनी यावेळी व्यक्त केली.