Ozar :  (ओझर, वार्ताहर)  – जुन्नर तालुक्यात देशी-विदेशी दारूची दुकाने, परमिट रूम आणि बिअर बारमध्ये नियमांची पायमल्ली होत असल्याच्या तक्रारी नागरिकांकडून करण्यात येत आहेत. काही ठिकाणी अल्पवयीन मुलांनाही दारू विक्री होत असल्याचा आरोप असून, त्यामुळे तरुण पिढी व्यसनाच्या आहारी जाण्याची भीती व्यक्त होत आहे.

जुन्नर, नारायणगाव आणि आळेफाटा येथे देशी-विदेशी दारूची दुकाने असून तालुक्यात मोठ्या प्रमाणात परमिट रूम व बिअर बार आहेत. दुकान आणि बार सुरू-बंद करण्याची वेळ तसेच मद्यविक्रीसंदर्भात नियम असतानाही काही ठिकाणी त्यांचे पालन केले जात नसल्याचे नागरिकांचे म्हणणे आहे.

दारूची वाहने, कार आणि व्हॅनमधून मोठ्या प्रमाणात वाहतूक करून धाबे, खेडी आणि वाड्या-वस्त्यांमध्ये अनधिकृत विक्री होत असल्याच्या तक्रारी आहेत. काही बारमध्ये अनधिकृत कॉटेज व झोपड्यांमध्ये मद्यपानासाठी ग्राहकांना बसविले जात असल्याचा आरोपही करण्यात आला आहे. रात्री उशिरापर्यंत बार सुरू राहत असल्याने शिवीगाळ, भांडणे आणि अपघातांच्या घटनांना चालना मिळत असल्याचे नागरिक सांगतात.

अवैध विक्रेत्यांवर अधूनमधून कारवाई होते; मात्र पुन्हा व्यवसाय सुरू होत असल्याचा आरोप आहे. पुणे ग्रामीण पोलीस आणि राज्य उत्पादन शुल्क विभागाने या प्रकरणाची सखोल चौकशी करून दोषींवर कठोर कारवाई करावी, अशी मागणी नागरिकांनी केली आहे.