Pune Corona : राज्यात पुन्हा एकदा कोरोनाचा धोका वाढताना दिसत आहे. गेल्या २४ तासांत ९८ नव्या कोरोना रुग्णांची नोंद झाली असून, त्यात मुंबई आणि पुणे महापालिका क्षेत्रात प्रत्येकी ३४ रुग्ण आढळले आहेत. पिंपरी-चिंचवडमध्ये १०, तर पुणे ग्रामीण भागात ४ रुग्ण सापडले आहेत. ही आकडेवारी चिंतेची असून, सावधगिरी बाळगण्याची गरज पुन्हा एकदा अधोरेखित होते. अशातच आता पुणेकरांना चिंतेत टाकणारी बातमी समोर आली आहे.

पुणे शहरातील सांडपाण्यात कोरोना विषाणूचा अंश आढळून आला आहे. राष्ट्रीय रासायनिक प्रयोगशाळेने (एनसीएल) केलेल्या तपासणीतून ही धक्कादायक माहिती समोर आली आहे. यामुळे प्रशासन आणि नागरिकांनी सतर्क राहणे गरजेचे आहे. शहरातील 10 सांडपाणी प्रक्रिया प्रकल्पांमधील पाण्याचे नमुने दर आठवड्याला तपासले जातात. यातून ही माहिती समोर आली आहे.

मे २०२५ पासून कोरोना विषाणूच्या अंशाचे प्रमाण वाढले

गेल्या काही आठवड्यांपासून या सर्व नमुन्यांमध्ये कोरोना विषाणूचा अंश आढळून आला आहे. तसेच मे २०२५ या नमुन्यांमध्ये कोरोना विषाणूच्या अंशाचे प्रमाण वाढत असल्याचे स्पष्ट झाले आहे. ज्यामुळे शहरातील संसर्गाची तीव्रता वाढत आहे. सांडपाण्यातील विषाणूच्या अंशांच्या अभ्यास हा संसर्गाचा अंदाज घेण्यासाठी महत्वाचा मानला जातो, यामुळे रुग्णसंख्या वाढण्यापूर्वीच प्रशासनाला सतर्क राहता येते. यामुळे पुणे महानगरपालिका आणि आरोग्य विभागाने नागरिकांना मास्क वापरणे, सोशल डिस्टंस आणि लसीकरण पूर्ण करण्याचे आवाहन केले आहे.

राज्यात गेल्या 24 तासांत 98 नव्या कोरोना रुग्णांची नोंद झाली आहे. मुंबईत आतापर्यंत सर्वाधिक ५७५ रुग्णांची नोंद, तर आता पुणेही कोरोनाच्या वाढत्या रुग्णसंख्येमुळे चर्चेत आहे. यामध्ये पिंपरी-चिंचवड, पुणे ग्रामीण परिसरातही नवीन रुग्ण सापडल्याने पुणे जिल्ह्यातील एकूण धोका वाढत आहे.