Pune Police – शहरातील गुन्हेगारीला प्रतिबंध घालण्यासाठी आणि नागरिकांमध्ये सुरक्षिततेची भावना बळकट करण्यासाठी पुणे पोलिसांनी शहरभर प्रभावी पायी गस्तीची व्यापक मोहीम सुरू केली आहे. गर्दीची ठिकाणे, बाजारपेठा, शाळा-महाविद्यालये, गुन्हेप्रवण परिसरात पोलिसांची प्रत्यक्ष उपस्थिती वाढविण्यावर मोहिमेत भर दिला आहे. प्रत्येक पोलीस ठाण्याच्या हद्दीत दुपारी ५ ते रात्री ९ या वेळेत गस्त सुरू राहणार आहे.

या मोहिमेत केवळ अंमलदारच नव्हे, तर वरिष्ठ पोलिस निरीक्षक, गुन्हे शाखेचे निरीक्षक, सहाय्यक पोलीस आयुक्त आणि पोलीस उपायुक्तांनाही प्रत्यक्ष गस्तीत सहभागी होतील. प्रत्येक पोलीस ठाण्याच्या हद्दीत किमान १० ते १२ ठिकाणी नियमित पायी गस्त घालण्यात येणार आहे. पायी गस्त सुरू करण्यापूर्वी संबंधित बीट प्रभारींनी अंमलदारांना त्या भागातील अलिकडील गुन्हे, सक्रिय गुन्हेगारांच्या हालचाली,

कायदा-सुव्यवस्थेच्या मुद्द्यांची माहिती देणे बंधनकारक केले आहे. गस्तीदरम्यान दुकानदार, स्टॉलधारक, सुरक्षारक्षक आणि स्थानिक नागरिकांशी संवाद साधून संशयास्पद व्यक्तींची माहिती गोळा करण्यास प्राधान्य दिले जाणार आहे. शाळा व महाविद्यालये सुरू होण्याच्या आणि सुटण्याच्या वेळेत विशेष गस्त ठेवून परिसरात विनाकारण फिरणाऱ्या आणि छेडछाड करणाऱ्या टोळक्यांवर तातडीने कारवाई करण्याच्या सूचना दिल्या आहेत.

तसेच बाजारपेठा, सराफ बाजार, बसथांबे आणि गर्दीच्या ठिकाणी चेन स्नॅचिंग, मोबाईल चोरी, बॅग लिफ्टिंग आणि छेडछाड यांसारखे गुन्हे रोखण्यासाठी संशयितांची चौकशी करून गस्त ठेवली जाईल. महिला, बालके आणि ज्येष्ठ नागरिकांना आवश्यक तेथे मदत करण्यावरही भर दिला आहे. परिमंडळीय पोलीस उपायुक्तांनी आठवड्यातून दोन ते तीन वेळा प्रत्यक्ष गस्त तपासण्याचे, तर प्रत्येक सोमवारी या मोहिमेचा आढावा घेण्याचे निर्देश दिले आहेत. पोलीस आयुक्त अमितेश कुमार, सहपोलीस आयुक्त संजय दराडे यांच्या मार्गदर्शनाखाली ही मोहीम राबविण्यात येत आहे.

“प्रत्येक पोलीस ठाण्याने स्थानिक परिस्थितीनुसार प्रभावी नियोजन करून ही मोहीम सातत्याने राबवावी. वरिष्ठ अधिकाऱ्यांनीही प्रत्यक्ष गस्तीत सहभागी होऊन या उपक्रमाची परिणामकारकता वाढविण्याच्या सूचना दिल्या आहेत.”
– संजय दराडे, सहपोलीस आयुक्त, पुणे शहर.