Pune News : उद्योगविश्वातील कुशल मनुष्यबळाची वाढती गरज पूर्ण करण्यासाठी शिक्षण प्रसारक मंडळीच्या वेलिंगकर इन्स्टीट्यूट ऑफ मॅनेजमेंट डेव्हलपमेंट अँड रिसर्च (वी-स्कूल) या नामांकित व्‍यवस्‍थापन संस्थेची देशातील तिसरी शाखा पुढील वर्षी पुण्यात सुरू होणार आहे. मुंबई (माटुंगा) आणि बेंगलोरनंतर पुण्यातील या नव्या संकुलाची घोषणा संस्थेच्या नियामक मंडळाचे अध्यक्ष सुधीर काळकर यांनी केली.

सर परशुरामभाऊ महाविद्यालयाच्या मैदानावरील ‘ज्ञानमंडपम’ येथे आयोजित माजी विद्यार्थी व कॉर्पोरेट मेळाव्यात ते बोलत होते. व्यासपीठावर उपाध्यक्ष राधेशाम अग्रवाल, सचिव रमा कुलकर्णी, महाविद्यालय विकास समितीचे अध्यक्ष सुनील जोशी आणि प्रा. डॉ. उदय साळुंखे उपस्थित होते.

भविष्यातील तांत्रिक आव्हानांचा सामना करण्यासाठी प्रभावी संवादकौशल्य, उत्तम व्यक्तिमत्त्व आणि मूल्याधारित शिक्षण देणे आवश्यक आहे, असे काळकर म्हणाले. सुनील जोशी यांनी संस्थेच्या प्रवासाचा आढावा घेतला. तर, २०२७-२८ या शैक्षणिक वर्षासाठी प्रस्तावित पुणे संकुलामुळे माजी विद्यार्थी आणि उद्योगांशी संबंध अधिक दृढ होतील, असा विश्वास रमा कुलकर्णी यांनी व्यक्त केला.

या प्रसंगी माजी विद्यार्थ्यांसाठी एका विशेष डिजिटल पोर्टलचे उद्घाटन करण्यात आले. या पोर्टलद्वारे व्यावसायिक नेटवर्किंग, ज्ञानाची देवाणघेवाण आणि संस्थेशी दीर्घकालीन संपर्क साधणे सोपे होणार आहे.

कार्यक्रमात शिक्षण प्रसारक मंडळी आणि वी-स्कूलच्या प्रवासावर आधारित दृकश्राव्य सादरीकरण करण्यात आले. या मेळाव्यास नियामक मंडळाचे सदस्य, प्राध्यापक, माजी विद्यार्थी आणि कॉर्पोरेट क्षेत्रातील प्रतिनिधी मोठ्या संख्येने उपस्थित होते.