पुणे – जम्मु काश्मिर येथील शोपियां या बाजार समितीमधुन ई-नामद्वारे येथील पुणे बाजार समितीमधील व्यापारी सुयोग सुर्यकांत झेंडे (श्री गुरुदेव दत्त एजन्सी) यांनी सफरचंद व पिअर या दोन शेतमालाची खरेदी केली. एकुण ११.६ टन खरेदी केली असुन या खरेदीची किंमत ११.७६ लाख रुपये असल्याचे राज्य कृषी पणन मंडळाकडून सांगण्यात आले. ई-नाम इंटरस्टेट ट्रेडअंतर्गत दोन राज्यातील बाजार समित्यांमध्ये ई-लिलावाद्वारे शेतमालाची खरेदी-विक्री करता येते. इंटरस्टेट ट्रेडला चालना देण्यासाठी पणन मंत्री जयकुमार रावल आग्रही आहेत. त्यांच्या मार्गदर्शनाखाली जम्मू काश्मिर येथील सफरचंद, पिअर व प्लम या शेतमालाची ई-नाममार्फत इंटरस्टेट ट्रेड करण्याबाबत कार्यवाही सुरु होती. त्या प्रमाणे पहिल्यांदा मंगळवारी (दि.५) पुण्यात हा शेतमाल व्यापार झाला आहे. ई-नाममुळे जम्मु काश्मिर येथील बाजार समित्या व पुणे बाजार समिती यांच्यामध्ये नव्याने खरेदीचो व्यवस्था कार्यान्वित झाली आहे. जम्मु काश्मिरप्रमाणे इतर राज्यातील शेतमाल ई-नामद्वारे खरेदी-विक्रीबाबत कार्यवाही सुरु असल्याचे पणन मंडळाचे सरव्यवस्थापक विनायक कोकरे यांनी सागितले. कृषी उत्पन्न बाजार समित्यांमध्ये शेतमालाच्या ई-नामद्वारे होणाऱ्या शेतमाल व्यापारातील विक्रीची रक्कम अडत्यांमार्फत थेट ई-पेमेंटद्वारे करण्याची सविधा समाविष्ट आहे. त्यामुळे शेतमालाची ऑनलाइन व्यापार-व्यवहारात अधिक पारदर्शकता आली आहे. यामुळे राज्यांतर्गत व्यापार वाढीस चालना मिळाली आहे. ई-लिलावाद्वारे सोयाबीन, हरभरा, मका, गहू, ज्वारी, हळद, तूर, उडीद, कांदा, डाळिंब, कोबी, रेशीमकोष आणि फळांची विक्री होत आहे. त्यामुळे राज्यातील ई-नाम बाजार समित्यामधील व्यापारी व शेतकऱ्यांनी आंतरराज्यीय व्यापारामध्ये जास्तीत जास्त सहभाग घ्यावा. – संजय कदम , कार्यकारी संचालक, राज्य कृषी पणन मंडळ,पुणे. राज्यात ई-नामद्वारे शेतमालाची विक्रीतुन २१ हजार ५८२ कोटींची उलाढाल केंद्र शासनाने शेतमालाच्या खरेदी विक्रीसाठी देशपातळीवर एक बाजार या संकल्पनेवर आधारीत राष्ट्रीय कृषि बाजार (ई-नाम) ही योजना सुरु केली आहे. महाराष्ट्रासह २३ राज्यातील तसेच ४ केंद्रशासोत प्रदेशातील मिळून देशातील १५२२ बाजार समित्या ई-नामला जोडल्या आहेत. यामध्ये महाराष्ट्रातील १३३ बाजार समित्या चार टप्यामध्ये ई-नामला जोडल्या आहेत. राज्यात ई-नाम द्वारे एकूण ५७८ लाख क्विं. शेतमालाची विक्री झाली असुन याची किंमत २१ हजार ५८२ कोटी रुपये आहे.
