Pune News : वडगाव शेरी विधानसभा मतदारसंघात गेल्या अनेक दिवसांपासून सुरू असलेल्या दूषित पाणीपुरवठ्याच्या समस्येवर तोडगा काढण्यासाठी महापालिकेच्या पाणीपुरवठा विभागाविरोधात लोकप्रतिनिधींनी घेतलेली आंदोलनाची भूमिका तूर्तास स्थगित करण्यात आली आहे.

महापालिका आयुक्त नवल किशोर राम यांनी समस्येची प्रत्यक्ष पाहणी करून आवश्यक उपाययोजना करण्याचे आश्वासन दिल्यानंतर हा निर्णय घेण्यात आला. मतदारसंघातील नागरिकांकडून दूषित पाणीपुरवठ्याबाबत सातत्याने तक्रारी करण्यात येत होत्या.

मात्र समस्या कायम असल्याने नगरसेवक अनिल उर्फ बॉबी टिंगरे, नगरसेवक राम दाभाडे, प्रभाग समिती अध्यक्ष तथा नगरसेवक अनिल सातव, नगरसेविका अश्विनीराहुल भंडारे, नगरसेविका संगीता दांगट तसेच नगरसेविका श्रेयस खांदवे यांच्यासह सर्व लोकप्रतिनिधींनी आंदोलनाचा इशारा दिला होता.

महिनाभरापासून खराब पाणी येत असल्याने नागरिकांमध्ये तीव्र नाराजी असून नागरिकांच्या रोषाचा सामना लोक प्रतिनिधींना करावा लागत आहे. त्यामुळे, नागरिकांसह सोमवारी दुपारी महापालिकेवर मोर्चाचे नियोजन करण्यात आले होते.  (Pune News)

दरम्यान, सभागृह नेते गणेश बिडकर यांच्यासह या भागातील लोक प्रतिनिधींनी महापालिका आयुक्त नवल किशोर राम यांच्यासोबत सविस्तर चर्चा झाली.

या बैठकीत आयुक्तांनी मंगळवार (दि. ९) रोजी भामा-आसखेड प्रकल्पाच्या जलशुद्धीकरण केंद्राला भेट देऊन दूषित पाणीपुरवठ्याच्या समस्येचा सखोल आढावा घेण्याचे तसेच कायमस्वरूपी उपाययोजना करण्याचे आश्वासन दिले.

आंदोलन तूर्तास स्थगित करण्याचा निर्णय घेण्यात आल्याचे नगरसेवक अनिल उर्फ बॉबी टिंगरे यांनी सांगितले. तसेच, नागरिकांना शुद्ध, सुरक्षित आणि नियमित पाणीपुरवठा मिळावा यासाठी पाठपुरावा यापुढेही सुरू राहील, असे अनिल टिंगरे यांनी सांगितले.