Pune News : बालेवाडी येथील एका बारमध्ये झालेल्या वादानंतर पोलिसांशी वाद घालून गोंधळ घालणाऱ्या तरुण-तरुणीवर बाणेर पोलिसांनी गुन्हा दाखल केला आहे. पोलिसांचे कर्तव्य बजावत असताना अडथळा निर्माण करणे, शिवीगाळ करणे आणि महिला पोलिस अधिकाऱ्याच्या हाताला चावा घेऊन जखमी केल्याचा आरोप या दोघांवर आहे. मानसी चंपालाल परिहार ( २४, रा. पिंपळे सौदागर) आणि युवराज निलेश परतानी ( २४, रा. पाषाण) अशी गुन्हा दाखल झालेल्यांची नावे आहेत. पोलिसांनी दिलेल्या माहितीनुसार, तीन मार्च रोजी रात्री सुमारे ११.४० वाजता बालेवाडी येथील ‘एजंट जॅक्स’ बारमध्ये भांडण झाल्याची माहिती बाणेर पोलिसांना मिळाली. Pune News त्यानंतर महिला पोलीस उपनिरीक्षक सुप्रिया मांढरे व इतर पोलिस कर्मचारी घटनास्थळी पोहोचले. त्यावेळी बारमध्ये एक तरुण व एक तरुणी मोठ्याने आरडाओरडा करत असल्याचे पोलिसांना आढळले. त्या दोघांनी बारमध्ये मारहाण झाल्याचा दावा करत सीसीटीव्ही फुटेज तात्काळ देण्याची मागणी केली. मात्र बार व्यवस्थापकाने फुटेजचे नियंत्रण मुंबईमध्ये असल्याने ते दुसऱ्या दिवशी उपलब्ध करून देऊ असे सांगितले. यानंतर संबंधित तरुण-तरुणी संतप्त झाले आणि पोलिसांशी वाद घालू लागले. नंतर हे दोघे बाणेर पोलिस ठाण्यात आले आणि तेथेही गोंधळ घातला. पोलिसांनी त्यांना उपचारासाठी रुग्णालयात जाण्याचा सल्ला दिला असतानाही त्यांनी ऐकले नाही. दरम्यान दोघांच्या तोंडातून दारूचा वास येत असल्याचेही पोलिसांनी नमूद केले या दोघांनी पोलिसांना शिवीगाळ केली, धक्काबुक्की केली तसेच सरकारी कामात अडथळा निर्माण केला. यावेळी मानसी परिहार हिने महिला पोलिस उपनिरीक्षकाच्या उजव्या हाताला चावा घेऊन जखमी केले. याशिवाय परिहार हिने “मी आत्महत्या करून तुमच्या नावांचा उल्लेख करीन” तर युवराज परतानी याने “माझी पावर वापरून तुमच्या नोकऱ्या घालवतो” अशी धमकी दिली
