Pune News : स्वारगेट चौकातील बेशिस्त वाहतूक आणि अवैध रिक्षा थांब्यांमुळे होणारी कोंडी फोडण्यासाठी वाहतूक शाखेने धडक मोहीम हाती घेतली आहे. गेल्या दोन दिवसांत स्वारगेट वाहतूक विभाग आणि प्रादेशिक परिवहन विभागाने (आरटीओ) केलेल्या संयुक्त कारवाईत तब्बल ३७५ रिक्षाचालकांवर दंडात्मक कारवाई करण्यात आली असून, १० सदोष रिक्षा जप्त करण्यात आल्या आहेत. या धडक मोहिमेमुळे गेल्या काही दिवसांपासून वाहतुकीच्या विळख्यात अडकलेल्या स्वारगेट चौकाने मोकळा श्वास घेतला आहे. स्वारगेट हा पुण्याचा मुख्य वाहतूक हब असून, येथे एसटी स्थानक, पीएमपी स्थानक आणि मेट्रोमुळे प्रवाशांची मोठी वर्दळ असते. मात्र, ‘नो पार्किंग’ आणि ‘नो हॉल्टिंग’ झोनमध्ये रिक्षांच्या रांगा, जादा प्रवासी भरणे आणि रस्त्याच्या मध्यभागी वाहने उभी करण्याच्या प्रकारांमुळे येथे दिवसभर गोंधळ उडत होता. या पार्श्वभूमीवर, वाहतूक शाखेचे उपायुक्त हिंमत जाधव यांच्या मार्गदर्शनाखाली स्वारगेट विभागाच्या सहायक पोलीस निरीक्षक शोभा क्षीरसागर आणि त्यांच्या पथकाने जेधे चौक, बस स्थानकाचे प्रवेशद्वार (इनगेट/आउटगेट) आणि महामेट्रो परिसराची नाकेबंदी करून ही विशेष मोहीम राबवली. Pune News या मोहिमेदरम्यान १० मार्च रोजी वाहतूक विभागाने एकट्या स्वारगेट परिसरात १४६ रिक्षांवर कारवाई केली. यामध्ये प्रामुख्याने जादा प्रवासी १११, भाडे नाकारणाऱ्या ३२ वाहनावर कारवाई केली. तर, ३ सदोष रिक्षा जप्त करण्यात आल्या. त्यानंतर १२ मार्च रोजी वाहतूक पोलीस आणि आरटीओ पुणे यांनी संयुक्तरीत्या कारवाईचा वेग वाढवला. या दिवशी १८६ केसेस वाहतूक विभागाने, तर ४३ केसेस आरटीओने नोंदवल्या. यामध्ये युनिफॉर्म नसणे ४८, वाहतुकीस अडथळा निर्माण करणे १८, भाडे नाकारणे २१ आणि ९२ जणांवर जादा प्रवासी भरल्याप्रकरणी कारवाई करण्यात आली. दोन दिवसांच्या या मोहिमेत एकूण १० रिक्षा जप्त करण्यात आल्या आहेत. …कारवाई यापुढेही सुरू राहणार Pune News केवळ तात्पुरती कारवाई न करता, चौकात कायमस्वरूपी शिस्त लावण्यासाठी ही मोहीम यापुढेही सातत्याने राबवण्यात येणार असल्याचे प्रशासनाकडून स्पष्ट करण्यात आले आहे. विशेषतः पीएमपी बसेसना वळण घेताना होणारा अडथळा आणि सिग्नल तोडण्याच्या प्रवृत्तीवर कडक लक्ष ठेवले जाणार आहे. प्रवाशांची गैरसोय टाळण्यासाठी आणि वाहतूक सुरळीत ठेवण्यासाठी रिक्षाचालकांनी नियमांचे पालन करावे, असे आवाहन पुणे शहर वाहतूक शाखेच्या वतीने करण्यात आले आहे. हेही वाचा: Vanshika Chadha : बालपणीची मैत्रीण होणार जोडीदार! कुलदीप यादवची होणारी पत्नी वंशिका चड्ढा कोण?
