Pune Nashik Railway – पुणे मंचरमार्गे नाशिक रेल्वे मार्गाच्या मागणीसाठी रविवार दि.९ रोजी क्रांतीदिनी सकाळी ९ वाजता मंचर बस स्थानकासमोर रास्ता रोको आंदोलन करण्यात येणार असल्याची माहिती रेल्वे कृती समितीने दिली.या आंदोलनाच्या नियोजनासाठी मंचर ता.आंबेगाव येथील तपनेश्वर मंदिरात गुरुवार दि.६ रोजी बैठक पार पडली. बैठकीत पुणे–नाशिक रेल्वेचा प्रस्तावित मार्ग अहिल्यानगरमार्गे नेण्याच्या हालचालीबाबत तीव्र नाराजी व्यक्त करण्यात आली.

पुणे–मंचर–संगमनेर–सिन्नर मार्गे रेल्वेची दीर्घकाळापासून मागणी असताना त्याकडे दुर्लक्ष होत असल्याचा आरोप उपस्थितांनी केला. आमदार सत्यजित तांबे आणि पुणे,अहिल्यानगर आणि नाशिक येथील पुणे-नाशिक रेल्वे कृती समितीचे उपाध्यक्ष राजेंद्र चौधरी आणि कार्याध्यक्ष संतोष फापाळे यांच्या मार्गदर्शनाखाली खेड,आंबेगाव, जुन्नर, संगमनेर व सिन्नर तालुक्यांत ठीक ठिकाणी ९ ऑगस्ट म्हणजे क्रांती दिनी एकाच दिवशी रास्ता रोको आंदोलन करून केंद्र सरकारचे लक्ष वेधण्याचा निर्णय घेण्यात आला.

बैठकीस रेल्वे कृती समितीचे आंबेगाव तालुका अध्यक्ष आणि निमंत्रक बाबाजी चासकर,भीमाशंकर सहकारी साखर कारखान्याचे माजी अध्यक्ष देवदत्त निकम, पंचायत समितीचे माजी सदस्य राजाराम बाणखेले, युवासेना कार्यकारिणी सदस्य सचिन बांगर, शिवसेना उपजिल्हा प्रमुख अजित चव्हाण, युवक अध्यक्ष विशाल वाबळे, नगरसेवक वसंतराव बाणखेले, उद्योजक दादाभाऊ थोरात, ॲड.राजू बेंडे पाटील, बाळासाहेब इंदोरे,सुदाम बाळाजी पडवळ यांच्यासह अनेक मान्यवर उपस्थित होते.

“पुणे–मंचर–नाशिक रेल्वे हा या भागाच्या विकासाचा कणा आहे.जनभावनेचा आदर करून शासनाने या मार्गाला तातडीने मंजुरी द्यावी.९ ऑगस्टचे आंदोलन मंचर येथे शांततापूर्ण, लोकशाही मार्गाने आणि व्यापक जनसहभागातून यशस्वी करू.
– बाबाजी चासकर,निमंत्रक, रेल्वे कृती समिती, आंबेगाव तालुका.