प्रभात वृत्तसेवा
पुणे : महापालिकेत कनिष्ठ अभियंता (स्थापत्य) पदाच्या १६९ जागांसाठी १ ते ३१ ऑक्टोबरदरम्यान अर्ज मागविले जाणार आहेत. मात्र या भरतीला पुन्हा निवडणुकीच्या आचारसंहितेचा अडथळा येण्याची शक्यता आहे. याआधी लोकसभा, विधानसभा निवडणुकीमुळे ही प्रक्रिया रखडली होती. त्यानंतर, मराठा आरक्षणच्या प्रक्रियेमुळे भरती रखडली होती.पालिकेने २०२२-२३ मध्ये विविध पदांसाठी ७४८ जागांची भरती केली होती.

त्यानंतर मार्च २०२४ मध्ये कनिष्ठ अभियंता पदासाठी ११३ जागांची भरती प्रक्रिया सुरू झाली. मात्र मराठा आरक्षणाचा समावेश, शासनाची मंजुरी आणि आयबीपीएससोबतचा करार संपल्याने प्रक्रिया ठप्प झाली. नव्याने करार झाल्यानंतर उमेदवारांना अर्जात बदल करण्याची मुभा देण्यात आली. त्यात ४ हजार ४९३ जणांनी बदल केला.
आता वाढीव जागांसाठी नवे अर्ज मागविले जाणार आहेत.

अर्ज स्वीकृतीनंतर ऑनलाइन परीक्षा घेऊन निकाल जाहीर केला जाईल आणि कागदपत्रांची पडताळणी करून गुणवत्ता यादी प्रसिद्ध केली जाईल. संपूर्ण प्रक्रियेस किमान दोन महिने लागणार आहेत. नोव्हेंबरमध्ये महापालिका निवडणुकीची आचारसंहिता लागू झाल्यास ही भरती तिसऱ्यांदा कचाट्यात सापडण्याची शक्यता आहे. अशा परिस्थितीत उमेदवारांना फेब्रुवारी २०२६ पर्यंत नियुक्ती मिळण्याची शक्यता आहे.

“अर्ज भरण्याची मुदत १ ते ३१ ऑक्टोबर आहे. जाहिरात आचारसंहितेपूर्वी काढल्याने अडथळा येणार नाही. पुढील दोन महिन्यात ही प्रक्रिया पूर्ण केली जाणार आहे.”
– विजयकुमार थोरात ( उपायुक्त, सामान्य प्रशासन विभाग)