Pune MSRTC – गणेशोत्सवासाठी कोकणात जाणाऱ्या प्रवाशांसाठी एसटी महामंडळाच्या पुणे विभागातून तब्बल २६० अतिरिक्त बस सोडण्यात आल्या आहेत. परिणामी मराठवाडा, उत्तर आणि पश्चिम महाराष्ट्रातील नियमित बससेवा विस्कळीत झाली आहे. सोलापूर, लातूर, कोल्हापूर आणि नाशिककडे जाणाऱ्या प्रवाशांना गाड्यांअभावी तासन् तास प्रतीक्षा करावी लागत असून, स्थानकांवर प्रवाशांची गर्दी वाढली आहे.

गणेशोत्सवाच्या काळात पुणे शहरासह जिल्ह्याच्या कानाकोपऱ्यातून कोकणवासी आपल्या मूळ गावी जातात. या प्रवाशांची गैरसोय टाळण्यासाठी एसटी प्रशासनाने अतिरिक्त बसेसची व्यवस्था केली. मात्र, हे करताना पुणे विभागातील इतर महत्त्वाच्या मार्गांवरील नियमित गाड्या कमी करण्यात आल्या.

परिणामी, मराठवाडा, पश्चिम महाराष्ट्र आणि उत्तर महाराष्ट्रातील विविध शहरांकडे जाणाऱ्या बसचे वेळापत्रक कोलमडल्याचे दिसून आले. गणेशोत्सव त्यात शनिवारपासून सलग सुट्ट्या सुरू झाल्याने पुण्यातील स्वारगेट आणि शिवाजीनगर बसस्थानकांवर प्रवाशांची गर्दी वाढू लागली आहे. मात्र, प्रवाशांच्या तुलनेत गाड्यांची संख्या कमी असल्याने नागरिकांना तासन् तास बसची वाट पाहावी लागत आहे.

विशेषतः सोलापूर, तुळजापूर, लातूर, नांदेड, परभणी, बीड, सांगली, सातारा, कोल्हापूर आणि नाशिककडे जाणाऱ्या प्रवाशांना बसची प्रतीक्षा करावी लागत आहे. बस आल्यावर प्रवाशांची झुंबड उडत असल्याने या गर्दीत लहान मुलांसह वृद्धांना चांगलाच मनस्ताप सहन करावा लागत आहे. त्यामुळे काही प्रवाशांनी तासन् तास वाट पाहूनही बस मिळत नसल्याने खासगी बसने किंवा नियोजन रद्द केल्याचे दिसून आले.