पुणे : मुख्यमंत्री एकनाथ शिंदे आज भीमाशंकर दौऱ्यावर आहेत. परंतु खराब हवामानामुळे त्यांचे हेलिकॉप्टर भीमाशंकर इथं पोचले नाही. हेलिकॉप्टरसाठी भीमाशंकर इथल्या आंबेगाव इथे लँडिंग स्पॉट होता. मात्र खराब हवामानामुळे हे हेलिकॉप्टर लांडेवाडी या ठिकाणी उतरवण्यात आले. यामुळे प्रशासनाची चांगलीच धावपळ उडाली.

यावेळी मुख्यमंत्री एकनाथ शिंदे यांनी पत्रकारांशी संवाद साधला असता प्रत्येक वर्षी प्रमाणे यंदा ही मी भीमाशंकर दर्शनाला आलोय. मला या प्राचीन वास्तूत आल्यावर मला प्रसन्न वाटतं. राज्यातील बळीराजा सुखी, समृद्ध होऊ दे. प्रत्येकाच्या आयुष्यात सुखाचे, समाधानाचे, आनंदाचे दिवस यावेत. असे साकडे एकनाथ शिंदेनी घातले.

मी पुढच्या वर्षी ही मुख्यमंत्री म्हणून भीमाशंकर दर्शनाला येणार का? हे भीमाशंकर ठरवतील अन माझी माय-बाप जनता ठरवेल. मी माझं काम करत राहणार. सर्वांसाठी कल्याणकारी योजना आणत राहणार. भीमाशंकराने मला ताकद द्यावी अन आशीर्वाद द्यावा असे एकनाथ शिंदे म्हणाले.

तसेच यावेळी एकनाथ शिंदे यांनी राजकीय भाष्य करणे टाळले. मुख्यमंत्री एकनाथ शिंदेंचा हा दौरा पूर्वनियोजित होता. भीमाशंकर मंदिरातील दर्शन आणि अभिषेकानंतर मुख्यमंत्री शिंदे ठाण्याकडे रवाना होणार आहेत.