Pune Internal Ring Road – पुणे महानगर प्रदेश विकास प्राधिकरणाने (पीएमआरडीए) अंतर्गत रिंगरोडचे प्रत्यक्ष काम आणि प्राथमिक भूसंपादनासाठी २०२६-२७ च्या अर्थसंकल्पात ५५.०३ कोटी रुपयांची भांडवली तरतूद केली आहे. ६५ मीटर रुंदीच्या या अत्याधुनिक मार्गावर प्रवाशांच्या सुविधेसाठी १२.६२ किलोमीटर लांबीचे बोगदे, १७ मोठे पूल आणि ९ उड्डाण पूल (इंटरचेन्जेस) उभारण्यात येणार आहेत. हा वर्तुळाकार मार्ग हिंजवडी आयटी पार्क,

चाकण एमआयडीसी आणि थेट लोहेगाव विमानतळाला जोडणार असल्याने दळणवळणाचा दर्जा आंतरराष्ट्रीय स्तराचा होणार आहे. पुणे आणि पिंपरी- चिंचवडकरांचा प्रवास अधिक सुकर आणि गतिमान करण्यासाठी पीएमआरडीएने सकारात्‍मक पावले उचलली आहेत. गेल्या काही काळापासून प्रलंबित असलेल्या ८३.१२ किलोमीटर लांबीच्या अंतर्गत रिंग रोड प्रकल्पातील सर्व प्रशासकीय आणि तांत्रिक अडथळे दूर करण्यात पीएमआरडीएला मोठे यश आले आहे.

आयुक्त डॉ. अभिजीत चौधरी यांनी यासाठी पुढाकार घेतला आहे. सध्या अभियांत्रिकी विभागाने सुचवलेल्या आधुनिक तांत्रिक सुधारणांचे अवलोकन करून प्रकल्पाचा सविस्तर आराखडा युद्धपातळीवर अंतिम करण्याचे आदेश त्यांनी दिले आहेत. प्रकल्पाला गती देण्यासाठी पीएमआरडीएने मोशी-आळंदी परिसरातील सोळू, निरगुडी आणि वढू खुर्द (वडगाव शिंदे) या प्राधान्यक्रमाच्या पहिल्या टप्प्यातील ४.७० किलोमीटरच्या गावांवर विशेष लक्ष केंद्रित केले आहे.

दुसऱ्या टप्‍प्‍यात पुण्यातील कामे
पहिल्या टप्प्यानंतर तातडीने नगर रस्ता ते सातारा रस्ता दरम्यानच्या पुढील टप्प्यांचे काम हाती घेतले जाणार आहे. यासाठी हवेली तालुक्यातील कदमवाकवस्ती, वडाचीवाडी, पिसोळी, येवलेवाडी, गुजर-निंबाळकरवाडी, मांगडेवाडी, भिलारेवाडी, जांभूळवाडी आणि आंबेगाव खुर्द या ९ प्रमुख गावांसह एकूण १४ गावांच्या भूसंपादनाचे काम अंतिम टप्प्यात आले आहे. या प्रकल्पासाठी ७२०.७८ हेक्टर खासगी जमिनीला सामाजिक प्रभाव मूल्यमापन (एसआयए) मधून शासनाने आधीच सूट दिल्यामुळे भूसंपादनाचा मार्ग मोकळा झाला आहे.