पुणे – महापालिकेच्या स्थायी समिती अध्यक्षपदासाठी हेमंत रासने यांची सलग चौथ्यांदा निवड झाली आहे. या निवडणुकीत रासने यांनी राष्ट्रवादीचे उमेदवार प्रदीप गायकवाड यांचा पराभव केला. रासने यांना 10, तर गायकवाड यांना 6 मते मिळाली. दरम्यान, रासने यांचे अध्यक्षपद पुढील 14 दिवसांसाठी असणार आहे.

महापालिकेच्या स्थायी समिती अध्यक्षपदाची मुदत 28 फेब्रुवारीला संपली होती. तर, महापालिका सभागृहाची मुदत 14 मार्च रोजी संपत आहे. त्यामुळे प्रशासनाने ही निवडणूक घेतली होती. स्थायी समितीत या 14 दिवसांसाठी भाजपने आपल्या सर्व विद्यमान सदस्यांना दिली. तर राष्ट्रवादीने आपले दोन सदस्य बदलले होते. मात्र, स्थायी समितीत सर्वाधिक 10 सदस्य भाजपचेच असल्याने रासने यांचा विजय निश्‍चित मानला जात होता.

स्थायी समितीमध्ये राष्ट्रवादीचे चार, शिवसेना व कॉंग्रेसचे प्रत्येकी एक असे एकूण 16 सदस्य आहेत. त्यामुळे रासने यांची निवड ही औपचारिकता होती. तरीही दगाफटका टाळण्यासाठी भाजपने सर्व सदस्यांना “व्हीप’ बजावला होता. तर रासने यांचा विजय निश्‍चित असल्याने महापालिकेत कार्यकर्त्यांनी गर्दी केली होती. रासने यांच्या निवडीनंतर महापौर मुरलीधर मोहोळ, स्वीकृत नगरसेवक गणेश बिडकर, विरोधीपक्ष नेत्या दीपाली धुमाळ, कॉंग्रेसचे गटनेते आबा बागुल यांनी रासने यांचे अभिनंदन केले. नगरसेवक राहूल भंडारे, राजाभाऊ लायगुडे, दीपक पोटे, धनराज घोगरे, जयंत भावे, महेश बावळे आदी यावेळी उपस्थित होते.

भाजप नेत्यांनी मला सलग चौथ्या वेळी स्थायी समितीचे अध्यक्ष होण्याची संधी दिली. प्रामाणिकपणे काम करणाऱ्या कार्यकर्त्यांना न्याय मिळतो, याचे हे उदाहरण आहे. पक्षाच्या सर्व पदाधिकाऱ्यांचे धन्यवाद. स्थायी समिती कधी बरखास्त होत नाही. त्यामुळे अर्थसंकल्प सादर करण्याचा प्रयत्न केला जाणार आहे. – हेमंत रासने, अध्यक्ष, स्थायी समिती