प्रभात वृत्तसेवा
विंझर – वेल्हे तालुक्याचे नवे नाव राजगड असं देण्यात आल आहे. राजगड नावाला केंद्र सरकारची मान्यता मिळाली आहे. छत्रपती शिवाजी महाराजांची प्रथम राजधानी असलेल्या राजगड किल्ल्याच्या पायथ्याशी वेल्हे तालुका आहे. मुख्यमंत्री देवेंद्र फडणवीस यांच्या सूचनेनंतर महसूल मंत्री चंद्रशेखर बावनकुळे यांनी हा निर्णय घेतला होता.

वेल्हे तालुक्यातील ७० पैकी ५८ ग्रामपंचायती तसेच पुणे जिल्हा परिषदेने नाव बदलाच्या मंजूर केलेल्या ठरावाला महसूल विभागाकडून मान्यता देण्यात आली आहे. महसूल मंत्री चंद्रशेखर बावनकुळे यांचा हा ऐतिहासिक निर्णय आहे. राजगड नावाला केंद्र सरकारची मान्यता देखील मिळाली आहे. पुणे जिल्ह्यासह राज्यभरात या केंद्राच्या निर्णयाबद्दल जल्‍लोष साजरा करण्यात आला.

महाराष्ट्र सरकार राजपत्र देखील जारी होणार आहे. पुणे जिल्ह्याच्या वेल्हे तालुक्यामध्ये राजगड तोरणासारखे मोठे ऐतिहासिक किल्ले आहेत. वेल्हे तालुक्यातल्या ज्या राजगड किल्ल्यावरून छत्रपती शिवाजी महाराजांनी २७ वर्षे स्वराज्याचा कारभार केला, त्या ऐतिहासिक राजगड किल्ल्याचे, स्वराज्याच्या पहिल्या राजधानीचे नाव वेल्हे तालुक्याला देण्याचा निर्णय राज्य मंत्रिमंडळाच्या बैठकीत घेण्यात आला होता.

मागील अनेक वर्षांपासून वेल्हे तालुका आणि पुणे जिल्हावासियांची ही मागणी होती. आता ही मागणी खऱ्या अर्थाने पूर्ण झाली आहे. वेल्हे तालुक्याचे नाव ‘राजगड’ करण्यासाठी तालुक्यातील ७० पैकी ५८ ग्रामपंचायतींचे सकारात्मक ठराव घेण्यात आले होते. पुणे जिल्हा परिषदेच्या २२ नोव्हेंबर २०२१ च्या सर्वसाधारण सभेत ‘राजगड’ नावाची शिफारस मंजूर करण्यात आली होती.

पुणे विभागीय आयुक्तांकडून 5 मे 2022 ला तसा प्रस्ताव सादर करुन घेण्यात आला होता. त्यानंतर आता अखेर वेल्हे तालुक्याचे नाव ‘राजगड’ करण्यासाठी मंत्रीमंडळाच्या बैठकीत निर्णय झाला होता. त्यानंतर आता राजगड नावाला केंद्र सरकारची मान्यता देखील मिळाली आहे. महाराष्ट्र सरकारचे राजपत्र जारी होणार आहे.

अजित पवार यांचा पाठपुरावा..
राज्याचे विरोधी पक्षनेते असताना 27 एप्रिल 2023 ला अजित पवारांनी तत्कालीन मुख्यमंत्री एकनाथ शिंदेंना पत्र लिहून राजगड नावाची कार्यवाही लवकरात लवकर करण्याची मागणी केली होती. त्यानंतर अखेर आता केंद्राच्या मान्यतेनंतर वेल्हे तालुक्याचे नाव राजगड, असे करण्यात आले आहे, अशी माहिती महसूलमंत्री चंद्रशेखर बावनकुळे यांनी दिली.तसेच नुकतेच 8 मे 2025 रोजी सध्याचे भोर वेल्हे मुळशीचे आमदार शंकर मांडेकर यांनी देखील मंत्रालयात वेल्हे तालुक्याच्या राजगड नामांतरासाठी पत्रव्यवहार केला होता.