Pune Ganeshotsav 2026 – गणेशोत्सवाच्या पार्श्वभूमीवर पुणे महापालिका प्रशासनाने शहरातील विसर्जन घाट, कृत्रिम हौद आणि मूर्ती संकलन केंद्रांची पाहणी करून तयारीचा आढावा घेतला आहे. नागरिकांच्या सुरक्षिततेसाठी शहरातील १५ प्रमुख विसर्जन घाटांवर २४ तास अग्निशमन दलाचा बंदोबस्त ठेवण्यात येणार असून, तब्बल ९० जीवरक्षकांची नियुक्ती केली आहे. याशिवाय मध्यवर्ती अग्निशमन केंद्रात ३० जीवरक्षक राखीव ठेवण्यात येणार आहेत.

महापौर मंजुषा नागपुरे यांनी शिवाजीनगर-घोले रोड, विश्रामबागवाडा आणि वारजे-कर्वेनगर क्षेत्रीय कार्यालयांतर्गत असलेल्या विविध विसर्जन घाटांची पाहणी केली. अलका चौक, पांचाळेश्वर आणि एस. एम. जोशी घाट येथे पाहणी करून संबंधित अधिकारी-कर्मचाऱ्यांना गणेशोत्सव काळात नागरिकांना आवश्यक त्या सुविधा तत्काळ उपलब्ध करून देण्याचे निर्देश त्यांनी दिले.

उपमहापौर, आयुक्तांनी केली पहाणी
औंध-बाणेर क्षेत्रीय कार्यालयांतर्गत उपमहापौर परशुराम वाडेकर यांनीही विसर्जन घाटांची पाहणी केली. तसेच, कोंढवा-उंड्री आणि हडपसर-मांजरी क्षेत्रीय कार्यालयांच्या हद्दीतील विसर्जन हौद, घाट आणि मूर्ती संकलन केंद्रांची पाहणी करण्यात आली. महापालिका आयुक्त नवल किशोर राम यांनी मुख्य रस्त्यांवरील खड्डे दुरुस्ती, सुलभ शौचालये, अतिरिक्त प्रकाश व्यवस्था, सार्वजनिक ध्वनिक्षेपक,

सीसीटीव्ही सनियंत्रण तसेच आपत्कालीन प्रतिसाद पथकांची व्यवस्था करण्याचे आदेश प्रशासनाला दिले आहेत. दरम्यान, अग्निशमन दलाच्या वतीने अमृतेश्वर घाट, पुलाची वाडी, नटराज सिनेमा परिसर, ओंकारेश्वर, वृद्धेश्वर, गरवारे महाविद्यालय, पांचाळेश्वर, अष्टभुजा मंदिर, संगम घाट, विठ्ठल मंदिर, बाप्पू घाट, ठोसर पागा घाट, चिमा उद्यान-येरवडा, दत्तवाडी आणि वारजे स्मशानभूमी या १५ घाटांवर विशेष बंदोबस्त ठेवण्यात येणार आहे.

घाटांवर नदीपात्रात आडवे दोरखंड, अतिरिक्त दोरखंड आणि लाईफ जॅकेटची व्यवस्था करण्यात येणार आहे. गणेशोत्सव काळात अधिकाधिक मनुष्यबळ उपलब्ध राहावे यासाठी १४ ते २६ सप्टेंबरदरम्यान अग्निशमन दलातील अधिकारी-कर्मचाऱ्यांच्या सर्व प्रकारच्या रजा बंद करण्यात आल्या आहेत. प्रत्येक घाटावर दुपारी एक ते रात्री नऊ या वेळेत फायरमन तैनात राहणार आहेत.

विद्युत सुरक्षेवरही विशेष लक्ष
गणेशोत्सवाच्या पार्श्वभूमीवर शहरातील स्ट्रीट लाईट पोलची तपासणी करण्यात आली असून, धोकादायक पोल, तुटलेले जंक्शन बॉक्स किंवा फिडर पिलर आढळल्यास तातडीने क्षेत्रीय कार्यालयाकडे तक्रार करण्याचे आवाहन केले आहे. गणेश मंडळांनी अनधिकृत वीज जोडणी न घेता अधिकृत तात्पुरती वीज जोडणी घ्यावी, असे महापालिकेने स्पष्ट केले आहे.