Pune Ganesh festival : गणेश विसर्जन मिरवणुकीच्या पार्श्वभूमीवर पुणे शहराच्या मध्यवर्ती भागातील वाहतूक सुरळीत आणि सुरक्षित ठेवण्यासाठी वाहतूक पोलिसांकडून मोठ्या प्रमाणात वाहतूक बदल करण्यात आले आहेत.

विसर्जन मिरवणूक संपेपर्यंत शहरातील प्रमुख रस्त्यांवरील वाहतूक बंद किंवा वळवण्यात येणार आहे. त्यामुळे नागरिकांनी शक्यतो सार्वजनिक वाहतुकीचा वापर करावा आणि वाहनचालकांनी पर्यायी मार्गांचा वापर करावा, असे आवाहन वाहतूक पोलिसांनी केले आहे.

वाहतूक शाखेचे पोलिस उपायुक्त डॉ. संदीप भाजीभाकरे यांनी याबाबत माहिती दिली. २४ सप्टेंबरच्या रात्री ११ वाजल्यापासून मुख्य विसर्जन मिरवणूक संपेपर्यंत मिरवणुकीच्या प्रमुख मार्गांवर नो-पार्किंग लागू करण्यात आले आहे.

पोलिस, अग्निशामक दल, रुग्णवाहिका आणि एमएसईबीच्या वाहनांना यातून वगळण्यात आले आहे. इतर सर्व वाहनांना मिरवणूक मार्गावर पार्किंग करण्यास मनाई असेल.

या प्रमुख मार्गांवर नो-पार्किंग Pune Ganesh festival :

लक्ष्मी रोड, केळकर रोड, कुमठेकर रोड, टिळक रोड, बाजीराव रोड, शिवाजी रोड, शास्त्री रोड, जंगली महाराज रोड, कर्वे रोड आणि फर्ग्युसन कॉलेज रोड या प्रमुख मार्गांवर नो-पार्किंगची अंमलबजावणी करण्यात आली आहे.

प्रमुख ठिकाणी वाहतूक वळवणार

विसर्जन मिरवणुकीच्या गर्दीनुसार शहरातील विविध चौकांवरून वाहतूक वळवण्यात येणार आहे. जंगली महाराज रोडवरील झाशी राणी चौक, शिवाजी रोडवरील काकासाहेब गाडगीळ पुतळा, मुदलियार रोडवरील अपोलो टॉकीज आणि दारूवाला पूल, लक्ष्मी रोडवरील संत कबीर पोलिस चौकी, सोलापूर रोडवरील सेव्हन लव्हज चौक, कर्वे रोडवरील नळ स्टॉप तसेच फर्ग्युसन कॉलेज रोड परिसरातून आवश्यकतेनुसार वाहतूक वळवली जाणार आहे.

‘या’ मार्गांवर वाहतूक बंद Pune Ganesh festival :
छत्रपती शिवाजी रोड : काकासाहेब गाडगीळ पुतळा ते जाधव चौक
लक्ष्मी रोड : संत कबीर चौकी ते अलका टॉकीज चौक
बाजीराव रोड : सावरकर चौक ते फुटका बुरुज चौक
कुमठेकर रोड : टिळक चौक ते चितळे कॉर्नर चौक
गणेश रोड : दारूवाला पूल ते जिजामाता चौक
केळकर रोड : बुधवार चौक ते अलका टॉकीज चौक
टिळक रोड : जाधव चौक ते टिळक चौक
शास्त्री रोड : सेनादत्त चौकी ते अलका टॉकीज चौक
जंगली महाराज रोड : झाशी राणी चौक ते खंडोजीबाबा चौक

या मार्गांवरही वाहतुकीवर निर्बंध

कर्वे रोडवरील नळ स्टॉप चौक ते खंडोजीबाबा चौक, फर्ग्युसन रोडवरील खंडोजीबाबा चौक ते फर्ग्युसन महाविद्यालयाचे मुख्य द्वार, भांडारकर रोडवरील पी.वाय.सी. जिमखाना ते गुडलक चौक आणि नटराज चौक, पुणे-सातारा रोडवरील व्होल्गा चौक ते जाधव चौक,

सोलापूर रोडवरील सेव्हन लव्हज चौक ते जाधव चौक, प्रभात रोडवरील डेक्कन पोलिस ठाणे ते शेलारमामा चौक, बागाडे रोडवरील सोन्या मारुती चौक ते फडके हौद चौक तसेच गुरु नानक रोडवरील देवजीबाबा चौक ते हमजेखान चौक आणि गोविंद हलवाई चौक या मार्गांवरही वाहतुकीवर निर्बंध राहणार आहेत.

विसर्जन मिरवणुकीदरम्यान मोठ्या प्रमाणात नागरिक रस्त्यावर येणार असल्याने वाहतूक कोंडी होण्याची शक्यता आहे. त्यामुळे नागरिकांनी वाहतूक पोलिसांच्या सूचनांचे पालन करावे, मिरवणूक मार्गावर वाहने पार्क करू नयेत आणि शक्य असल्यास मेट्रो, बस यांसारख्या सार्वजनिक वाहतुकीचा वापर करावा, असे आवाहन करण्यात आले आहे.

गणेश विसर्जन सोहळा सुरळीत आणि सुरक्षित पार पडावा, तसेच मिरवणुकीदरम्यान नागरिकांना कोणताही त्रास होऊ नये, यासाठी वाहतूक पोलिसांकडून विशेष नियोजन करण्यात आले आहे.