पुणे – आरक्षण जाहीर झाल्यानंतर खऱ्या अर्थाने महापालिका निवडणुकीला रंग येण्याला सुरूवात झाली असून इच्छुकांनी मोर्चेबांधणी सुरू केली आहे. आता तिकिटासाठीही सर्व पक्षश्रेष्ठींकडे धडपड सुरू केली आहे. आरक्षण सोडत आपल्याच पक्षाला अनुकूलच आहे. महापालिकेवर आपलीच सत्ता येऊन आपलाच महापौर होणार असा दावा प्रत्येक पक्षाच्या शहराध्यक्षांनी केला आहे. आरक्षणावर विविध पक्षांच्या शहराध्यक्षांच्या प्रतिक्रिया अशा. धीरज घाटे (भाजप) – आता आरक्षण पडले असून प्रभागात कोण, कोण इच्छुक आहेत याची छाननी करणार, मुलाखती होतील, आणि उमेदवार निश्चिती होईल. ज्याला निवडणूक लढवायची तो तयारी करतोच. आता हव्या त्या प्रभागात कोण उमेदवार म्हणून बसू शकतो, आरक्षण, निवडून येण्याची क्षमता, सामाजिक समतोल हे सगळे पाहून निर्णय करू. अरविंद शिंदे (काँग्रेस) – प्रभाग आरक्षणांचे जसे भाकीत होते तसेच झाले आहे. प्रभाग रचना झाली त्याचवेळी सगळे कामाला लागले होतेच. ज्या पद्धतीने महायुतीचे एकेक जमीन घोटाळे, भूखंडांचे श्रीखंड खाणे अशी प्रकरणे बाहेर येत आहेत, त्यामुळे मतदार आपला राग मतपेट्यांतून दाखवतील. जमीन घोटाळ्याचा मुळशी पॅटर्न जनता नक्कीच नाकारणार. शैलेंद्र चव्हाण (आरपीआय)– आम्हाला आरक्षण अनुकूल आहे. आम्ही महायुतीमध्ये जागा वाटपात २० जागा मागणार आहोत. चर्चेतून किती जागा मिळतात ते पाहु. ज्या ठिकाणी माजी नगरसेवकांना अनुकूल आरक्षण नाही ते सर्वसाधारण मधून निवडणूक लढवतील. काही ठिकाणी हवे असलेले महिला आरक्षण झाले आहे. पहिल्या पाच जागा आम्हांला पूर्णपणे मिळतील. नाना भानगिरे(शिवसेना, शिंदे गट)– ४१ प्रभागात आम्ही तयारी सुरू केली आहे. महायुती म्हणूनच आम्ही लढणार आहोत. किती जागा लढवायच्या या बाबतचा निर्णय लवकरच पक्षश्रेष्ठी निर्णय होईल. संजय मोरे (शिवसेना, ठाकरे गट) – आम्ही महाविकास आघाडीतून लढणार आहोत. आरक्षण कसेही पडू द्या, आमची लढण्याची तयारी आहे. महाविकास आघाडीचा महापौर आम्ही करणार. जनतेलाही आता भाजप नको आहे. जनता त्यांना धडा शिकवल्याशिवाय राहणार नाही. सुभाष जगताप (राष्ट्रवादी कॉंग्रेस) -भाजपने त्यांच्या सोयीने प्रभाग रचना केली असतील तरी आरक्षणे आमच्या सोयीने पडली आहेत. वाहतुकीची प्रचंड समस्या आहे. त्याचा राग मतदानातून लोक दाखवतील. आम्ही महायुतीबरोबर लढणार नाही, आम्ही स्वतंत्र लढणार आहोत. पंतप्रधान नरेंद्र मोदी, राज्यात मुख्यमंत्री देवेंद्र फडणवीस यांचे काम चांगले आहे, परंतु महापालिकेत विचित्र काम भाजपच्या नेतेमंडळींनी केले आहे. प्रशांत जगताप (राष्ट्रवादी कॉंग्रेस, शरद पवार) – प्रभाग रचना महाविकास आघाडीला अनुकूल आहे. महाविकास आघाडीतून आम्ही लढू. महायुतीतील कोणत्याही पक्षाबरोबर आम्ही जाणार नाही. अजित पवार यांच्या राष्ट्रवादी कॉंग्रेसबरोबरही आम्ही जाणार नाही. त्यांच्याबरोबर छुपी किंवा उघड आघाडीही करणार नाही.
