प्रभात वृत्तसेवा पुणे – पिस्तुलाच्या धाक दाखवून एकाला जीवे मारण्याची धमकी, तसेच खंडणी मागितल्याप्रकरणी गुंड श्वेतांग निकाळजेसह साथीदारांविरुद्ध भारती विद्यापीठ पोलिसांनी गुन्हा दाखल केला. पसार झालेल्या निकाळजेसह साथीदारांचा पोलिसांकडून शोध घेण्यात येत आहे.याप्रकरणी श्वेतांग निकाळजे, रोमिओ कांबळे, ओम गायकवाड (तिघे रा. भीमनगर, मंगळवार पेठ), स्वप्निल कांबळे (धायरी) यांच्याविरुद्ध गुन्हा दाखल करण्यात आला आहे. याप्रकरणी एकाने भारती विद्यापीठ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, निकाळजे याची मंगळवार पेठ, तसेच भारती विद्यापीठ भागात दहशत आहे. निकाळजे याच्याविरुद्ध फरासखाना, भारती विद्यापीठ पोलीस ठाण्यांत खून, खुनाचा प्रयत्न, बेकायदा पिस्तुल बाळगणे, दहशत माजविणे असे गंभीर स्वरूपाचे गुन्हे दाखल आहेत. येरवडा कारागृहात काही वर्षांपूर्वी निकाळजे आणि साथीदारांनी सांगलीतील एका गुंडावर हल्ला केला होता. या घटनेत गुंड गंभीर जखमी झाला होता. शिवाजीनगर न्यायालयासमोर निकाळजे आणि साथीदारांनी एका साक्षीदारावर पिस्तुलातून गोळीबार केला होता. एका अल्पवयीन युवतीला धमकावून तिच्यावर अत्याचार केल्याप्रकरणी निकाळजेविरुद्ध गुन्हा दाखल करण्यात आला होता.तक्रारदार तरुण आंबेगाव पठार भागात राहायला आहे. निकाळजे आणि तरुणाची ओळख आहे. मोबाइल मनोऱ्याचे काम तरुणाला मिळाले होते. ८ ऑक्टोबर रोजी निकाळजे, कांबळे गायकवाड यांनी तक्रारदार तरुणाला भेटायला बोलाविले. तू आता मोठा झाला आहे. तू कंपन्यांचे काॅन्ट्रॅक्ट मिळवायला लागला आहे. आम्हाला आता विचारत नाही, अशी धमकी आरोपींनी त्याला दिली. त्यानंतर तरुणलाा धमकावून मोटारीतून भोर परिसरात नेले. निकाळजेने त्याच्याकडील दोन पिस्तुले काढली. कोणत्या पिस्तुलातून तुला गोळी घालू, अशी धमकी दिली. त्यानंतर घाबरलेल्या तरुण आरोपींच्या तावडीतून पळाला. त्यानंतर आरोपींनी तरुणााला पकडून शिवाजीनगर भागात आणले. त्याला मारहाण करून कोयत्याचा धाक दाखवून जीवे मारण्याची धमकी दिली. त्यानंतर आरोपी पसार झाला. पसार झालेल्या आरोपींचा शोध घेण्यात येत असून, पोलीस उपनिरीक्षक नीलेश मोकाशी तपास करत आहेत.
