Pune Crime – मोक्का कारवाईनंतर नऊ महिन्यांपासून फरार असलेल्या कुख्यात गुंड नीलेश घायवळचा भाऊ सचिन बन्सीलाल घायवळ (४८) याला अखेर पुणे पोलिसांनी राजस्थानातून अटक केली आहे. गुन्हे शाखेच्या युनिट-३ च्या पथकाने सिकर जिल्ह्यातील दिंगपूर गावात सापळा रचून ही कारवाई केली. खंडणीप्रकरणात मोक्काअंतर्गत कारवाई झाल्यानंतर सचिन पुण्यातून पसार झाला होता.

तो वारंवार ठिकाणे बदलत असल्याने पोलिसांच्या हाती लागत नव्हता. तो राजस्थानातील सिकर जिल्ह्यात वास्तव्यास असल्याची माहिती मिळाल्यानंतर पोलिसांनी स्थानिक पोलिसांच्या मदतीने त्याला ताब्यात घेतले. सचिनविरोधात कोथरूड आणि वारजे पोलिसांत एकूण पाच गुन्हे दाखल आहेत. वारजे पोलिसांत नोंद असलेल्या ४४ लाख ३६ हजार रुपयांच्या खंडणीप्रकरणात त्याच्यावर मोक्का लावला होता.

कर्वेनगर, वारजे आणि शिवणे परिसरातील शाळांना खाद्यपदार्थ पुरवणाऱ्या कंपनीच्या महिला संचालिकेकडून खंडणी उकळल्याचा त्याच्यावर आरोप आहे. तपासादरम्यान तो केवळ आवश्यक तेव्हाच मोबाइल सुरू करत असल्याने त्याचा माग काढणे आव्हानात्मक होते. गेल्या चार दिवसांपासून गुन्हे शाखेचे पथक राजस्थानात तळ ठोकून होते. अखेर दिंगपूर गावातून त्याला अटक केली. ही कारवाई गुन्हे शाखेचे पोलीस उपायुक्त गौहर हसन यांच्या मार्गदर्शनाखाली निरीक्षक प्रशांत अन्नछत्रे, सहाय्यक निरीक्षक ज्ञानेश्वर ढवळे आणि पथकाने केली.

मंदिराच्या प्रसादावर गुजराण
पुण्यातून पळून गेल्यानंतर सचिन काही काळ सोलापूरमध्ये राहात होता. त्यानंतर तो जयपूरमार्गे सिकर जिल्ह्यातील दिंगपूर गावात दाखल झाला. १० फेब्रुवारीपासून महिन्याला साडेसहा हजार रुपये भाडे देऊन तो तेथे राहात होता. फरार होताना त्याच्याकडे साडेतीन लाख रुपये होते. त्याच पैशांतून तो खर्च भागवत होता, तसेच गावातील मंदिरात मिळणाऱ्या प्रसादावर त्याने अनेक दिवस काढल्याची माहिती तपासात समोर आली आहे.