प्रभात वृत्तसेवा
पुणे – गुंड नीलेश घायवळ याच्यावर पुणे पोलिसांकडून आतापर्यंत वेगवेगळ्या गंभीर प्रकाराचे दहा गुन्हे दाखल करण्यात आले आहेत. पोलिसांकडून नीलेशची आर्थिक बाजू कमकुवत करण्यासाठी शक्य तेवढे प्रयत्न सुरू आहेत.कोथरूड परिसरातील पोलिसांनी गुंड नीलेश घायवळच्या घरझडतीत दोन काडतुसे, तसेच चार पुंगळ्या जप्त केल्या. याप्रकरणी घायवळविरोधात कोथरूड पोलिसांत आर्म ॲक्टनुसार गुन्हा दाखल करण्यात आला आहे. दरम्यान, त्याच्या घरझडतीत एक ॲम्युनेशन बॉक्स (बंदुकीच्या गोळ्या ठेवण्याचा बॉक्स) देखील आढळून आला होता.

हा बॉक्स रिकामा असला, तरी तो बॉक्स नीलेश घायवळपर्यंत कसा पोहोचला, याचा तपास पुणे पोलिसांकडून केला जात आहे. मोक्काअंतर्गत कारवाई करण्यात आलेला गुंड घायवळ सध्या विदेशात फरार आहे. सोमवारी (दि. ६) पोलिसांनी घेतलेल्या घरझडतीमध्ये त्याच्या घरातील तिसऱ्या मजल्यावर असलेल्या जिन्यात इन्व्हर्टरचा एक लोखंडी बॉक्स होता. पोलिसांनी तो बॉक्स उघडून बघितला असता, त्यात इन्व्हर्टरच्या मागे एक लोखंडी बॉक्स आढळला.

तो बॉक्स खाली काढून बघितला असता, पिस्तुलाच्या गोळ्या ठेवण्यासाठी बॉक्स असल्याचे पोलिसांना स्पष्ट झाले. त्या बॉक्सवर २०१७ वर्षाचा उल्लेख असून, ५.५६ एमएम असे लिहिलेले आहे.पोलिसांना बॉक्स मिळाला, तेव्हा त्यात एक सत्तूर (मोठा सुरा) सापडला. त्याव्यरिक्त बॉक्समध्ये एकही काडतूस आढळले नाही. संबंधित बॉक्समध्ये ३०० काडतुसं बसतात. त्यामुळे त्यातील काडतुसं कुठे गेली, हा प्रश्न देखील उपस्थित होऊ लागला आहे.

याप्रकरणी पोलिसांनी खडकी येथील ॲम्युनेश फॅक्टरीसोबत पत्रव्यवहार केला असून, हा बॉक्स नेमका कोणत्या ॲम्युनेश फॅक्टरीतून बाहेर आला आहे, याबाबत माहिती विचारण्यात आली आहे. हा बॉक्स फॅक्टरीबाहेर कसा आला, कुणाला दिला, याचे रेकॉर्डही पोलिसांनी मिळविण्यास सुरू केल्याचे वरिष्ठ पोलीस अधिकाऱ्यांनी बोलताना सांगितले.