Pune Crime – बंडगार्डन पोलीस ठाण्यात कार्यरत असलेल्या एका पोलीस उपनिरीक्षकाविरुद्ध लाच मागितल्याप्रकरणी लाचलुचपत प्रतिबंधक विभागाने (एसीबी) गुन्हा दाखल केला आहे. तक्रारदाराकडून फसवणुकीचा गुन्हा दाखल न करण्यासाठी दोन लाख रुपयांची मागणी केल्याचा आरोप संबंधित अधिकाऱ्यावर आहे. लाचलुचपत प्रतिबंधक विभागाकडे एका ४० वर्षीय तक्रारदाराने ३ फेब्रुवारी रोजी तक्रार दिली होती. तक्रारदाराविरुद्ध बंडगार्डन पोलीस ठाण्यात फसवणुकीबाबत तक्रार अर्ज दाखल होता. या अर्जाची चौकशी पोलीस उपनिरीक्षक संदीप खेडकर करत होते. चौकशीदरम्यान तक्रारदाराविरुद्ध गुन्हा दाखल न करण्यासाठी आरोपी अधिकाऱ्याने सुरुवातीला २ लाख रुपयांची लाच मागितल्याचा आरोप करण्यात आला आहे. लाचलुचपत प्रतिबंधक विभागाकडून ३ फेब्रुवारी रोजी करण्यात आलेल्या पडताळणीदरम्यान, पंचासमक्ष, तसेच तक्रारदाराच्या वकिलासमोर तडजोडीअंती १ लाख रुपयांची लाच स्वतःसाठी व वरिष्ठांसाठी मागितल्याचे निष्पन्न झाले. त्यानंतर याप्रकरणी बंडगार्डन पोलीस ठाण्यात गुन्हा दाखल करण्यात आला. या प्रकरणाचा तपास लाचलुचपत प्रतिबंधक विभागाचे पोलीस निरीक्षक प्रवीण निंबाळकर करत आहेत. ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजीत पाटील आणि अपर पोलीस अधीक्षक अर्जुन भोसले यांच्या मार्गदर्शनाखाली करण्यात आली. सापळा अधिकारी म्हणून सहाय्यक पोलीस आयुक्त नीता मिसाळ यांनी काम पाहिले.
