PMC Property Tax – पुणे महापालिकेच्या मिळकतकर सवलत योजनेची अंतिम मुदत अवघ्या पाच दिवसांवर आली असताना शहरातील मोठ्या संख्येने नागरिकांनी अद्याप कर भरलेला नसल्याचे समोर आले आहे. महापालिकेच्या नोंदीनुसार शहरात एकूण १५.०५ लाख मिळकती नोंदणीकृत असताना १ एप्रिल ते २५ मे या कालावधीत फक्त ४ लाख ९६ हजार ३२५ मिळकतधारकांनी कराचा भरणा केला आहे.

त्यामुळे सुमारे दहा लाखांहून अधिक नागरिकांनी अद्यापही कर भरलेला नाही. या पार्श्वभूमीवर मिळकतकराची बिले अनेक भागांत अद्याप पोहोचली नसल्याच्या तक्रारी समोर येत आहेत. महापालिकेकडून पोस्टाद्वारे बिले पाठविली जात असली तरी अंतिम मुदत जवळ येऊनही अनेक नागरिकांना प्रत्यक्ष बिले मिळाली नसल्याचे सांगितले जात आहे. त्यामुळे कर भरण्याबाबत संभ्रम निर्माण झाला आहे.

तर दुसरीकडे महापालिकेने मोबाईलवर लिंकद्वारे कर भरण्याची सुविधा उपलब्ध केली आहे. मात्र, ऑनलाइन फसवणुकीच्या वाढत्या घटनांमुळे अनेक नागरिक मोबाईलवर आलेल्या लिंकवरून व्यवहार करण्यास टाळाटाळ करीत असून, प्रत्यक्ष बिल आल्याशिवाय कर भरण्यास पुढे येत नसल्याचे चित्र आहे.

पालिकेच्या तिजोरीत ८४६ कोटी
५५ दिवसांत महापालिकेच्या तिजोरीत ८४६ कोटी ७८ लाख रुपयांचा महसूल जमा झाला आहे. यामध्ये ऑनलाइन कर भरणाऱ्यांचे प्रमाण सर्वाधिक असून ७२.१३ टक्के म्हणजे ३ लाख ५८ हजार २४ मिळकतधारकांनी ५५७ कोटी २ लाख रुपयांचा कर भरला आहे. तर चेकद्वारे २१४ कोटी ८९ लाख रुपये आणि रोख स्वरूपात ७४ कोटी ८७ लाख रुपये जमा झाले आहेत.

महापालिकेने नागरी सुविधा केंद्रांवरील गर्दी टाळण्यासाठी ऑनलाइन संकेतस्थळासह बँक ऑफ महाराष्ट्र, आयसीआयसीआय बँक आणि कॉसमॉस बँकेच्या शाखांमधूनही कर भरण्याची सुविधा उपलब्ध केली आहे. ३१ मेनंतर कर भरणाऱ्यांना ५ ते १० टक्के सवलतीचा लाभ मिळणार नसल्याने नागरिकांनी अंतिम मुदतीपूर्वी कर भरावा, असे आवाहन प्रशासनाने केले आहे.

महापालिकेने मुदतवाढ द्यावी
महापालिकेकडून दरवर्षी मार्च महिन्याच्या शेवटच्या आठवडयात मिळकतकराची बीले पोस्टाने पाठविण्यात येतात. यंदाही प्रशासनाने १ एप्रिल पासून बिले नागरिकांना पाठविण्यात आल्याचा दावा करण्यात आला आहे. मात्र,शहराच्या मध्यवर्ती पेठांसह, कोथरूड, सिंहगड रस्ता, कात्रज, विश्रांतवाडी, नगररस्ता, एरंडवणे अशा अनेक भागात नागरिकांना अद्यापही बिले मिळाल्या नसल्याच्या तक्रारी येत आहेत. त्यामुळे, महापालिकेने सवलतीत कर भरण्यास मुदतवाढ द्यावी अशी मागणी सजग नागरीक मंचाचे अध्यक्ष विवेक वेलणकर यांनी केली आहे.