प्रभात वृत्तसेवा शिक्रापूर – कोरेगाव भीमा (ता. शिरूर) येथील नक्षत्र सोसायटीमध्ये एका अपंग युवकाला त्याच्या व्यंगत्वावरून चिडवून मद्यधुंद तरुणांनी दारूच्या बाटलीने आणि लाकडी दांडक्याने मारहाण केल्याची घटना घडली आहे. याप्रकरणी पीडित युवकाच्या पत्नीलाही धक्काबुक्की करण्यात आली. शुभम बाळासाहेब अडसुरे (वय २३) असे पीडित युवकाचे नाव आहे. शुभम यांच्या फिर्यादीवरून, शिक्रापूर पोलिसांनी दोन तरुण आणि एका महिलेवर गुन्हा दाखल केला आहे. मिळालेल्या माहितीनुसार, शुभम हे सोसायटीत फिरत असताना, तेथे दारू पिऊन आलेल्या शुभम उत्तेकर आणि जयेश गव्हाणे यांनी त्यांना व्यंगत्वावरून चिडवले. अडसुरे यांनी याचा जाब विचारला असता, दोघांनी त्यांना शिवीगाळ करत मारहाण केली. अडसुरे यांची पत्नी मध्यस्थीसाठी आली असता, तिलाही ढकलून दिले. त्यानंतर जयेशच्या आईनेही अडसुरे यांना पोलिसांत गेल्यास जीवे मारण्याची धमकी दिली. याप्रकरणी शिक्रापूर पोलीस ठाण्यात तिघांवर गुन्हा दाखल करण्यात आला असून, पुढील तपास पोलीस हवालदार महेंद्र पाटील करत आहेत.
