Pune Crime – शहरातील गुंतवणूकदारांना महिन्याला ४, ७ ते १० टक्क्याने दराने परताव्याचे आमिष दाखवून कोट्यवधी रुपयांची आर्थिक फसवणूक केल्याच्या आरोपावरून कोरेगाव पार्क येथील इन्फिस्को शेअर मार्केट कंपनीचे मालक भूपेश अशोक दीक्षित (४२) याच्याविरुद्ध गुन्हा दाखल करण्यात आला आहे.पोलिसांनी दिलेल्या माहितीनुसार, पुणे शहरातील एका महिला फिर्यादीसह अनेक नागरिकांना शेअर मार्केट गुंतवणुकीत मोठा नफा मिळवून देण्याचे आश्वासन देण्यात आले होते. गुंतवणूक केल्यास दरमहा ठराविक टक्केवारीने परतावा देण्याचे सांगून संबंधितांकडून मोठ्या प्रमाणात रक्कम उभारण्यात आली. सुरुवातीच्या काही महिन्यांत परतावा देऊन गुंतवणूकदारांचा विश्वास संपादन करण्यात आला. मात्र, त्यानंतर मूळ रक्कम, तसेच नफा परत न करता गुंतवणूकदारांची कोट्यवधी रुपयांची फसवणूक झाल्याची तक्रार दाखल झाली आहे. याप्रकरणी कोरेगाव पार्क पोलीस ठाणे येथे भारतीय न्याय संहिता २०२३, तसेच महाराष्ट्र ठेवीदारांच्या हितसंबंध संरक्षण अधिनियम १९९९ चे कलम ३ व ४ अंतर्गत गुन्हा नोंदविण्यात आला आहे. या गुन्ह्याचा तपास आर्थिक गुन्हे शाखेकडे वर्ग करण्यात आला असून, पोलीस निरीक्षक उत्कर्षा देशमुख या तपास करीत आहेत.ही कारवाई पोलीस अप्पर पोलीस आयुक्त (गुन्हे) पंकज देशमुख, पोलीस उप आयुक्त (आर्थिक व सायबर गुन्हे) विवेक मासाळ आणि सहाय्यक पोलीस आयुक्त शुभदा संखे यांच्या मार्गदर्शनाखाली सुरू आहे. पोलिसांचे आवाहन इन्फिस्को शेअर मार्केट कंपनीमार्फत परताव्याचे आमिष दाखवून फसवणूक झाल्याचा संशय असलेल्या इतर नागरिकांनी संबंधित कागदपत्रे व पुरावे घेऊन आर्थिक गुन्हे शाखा, पुणे शहर येथे संपर्क साधावा, असे आवाहन पोलिसांनी केले आहे.
