Cyber Fraud – शेअर मार्केटमध्ये मोठा नफा मिळवून देण्याचे आमिष दाखवून एका महिलेची तब्बल ६१ लाख ६४ हजार ९४१ रुपयांची ऑनलाईन आर्थिक फसवणूककरण्‍यात आली. ही घटना चिंचवड परिसरात सप्टेंबर ते ऑक्टोबर २०२५ या कालावधीत घडली.इशिका चोप्रा, जयेश कौल, रिचार्ज मॅनेजर (पूर्ण नाव, पत्‍ता माहिती नाही) अशी गुन्‍हा दाखल झालेल्‍या आरोपींची नावे आहेत.

याबाबत चिंचवडमधील एका महिलेने शुक्रवारी (दि. ६) याबाबत चिंचवड पोलीस ठाण्‍यात फिर्याद दिली आहे. पोलिसांनी दिलेल्या माहितीनुसार, सप्टेंबर ते ऑक्टोबर २०२५ या कालावधीत चिंचवडमधील महिलेशी ऑनलाइन लिंकच्या माध्यमातून फिर्यादीशी संपर्क साधण्यात आला. त्‍यांना वेगवेगळ्या बँक खात्यांमध्ये पैसे गुंतविण्यास सांगून शेअर मार्केटमध्ये मोठा परतावा मिळेल,

असे आमिष दाखवून त्‍यांचा विश्वास संपादन करण्यात आला. व्हॉट्सअ‍ॅप ग्रुपच्या माध्यमातून वारंवार संदेश पाठवून फिर्यादीकडून मोठी रक्कम वसूल करण्यात आली. मात्र गुंतवणुकीचा कोणताही परतावा देण्यात आला नाही किंवा गुंतवणूक केलेली रक्कमही परत करण्यात आली नाही. या प्रकरणी चिंचवड पोलीस ठाणे अधिक तपास करीत आहे.