प्रभात वृत्तसेवा
पुणे – हुंड्यासाठी मानसिक-शारीरिक छळ करून वैष्णवी हगवणेला आत्महत्येस प्रवृत्त केल्याप्रकरणी तिची सासू, नणंद आणि पतीच्या मित्राचा जामीन अर्ज पुणे न्यायालयाने फेटाळला.हुंडाबळी हा समाजासाठी मोठा कलंक आहे. नऊ महिन्यांच्या बाळाची आई दबावाशिवाय असा टोकाचा निर्णय घेऊ शकत नाही. आरोपींवर कटकारस्थान रचणे, आत्महत्येस प्रवृत्त करणे, पुरावे नष्ट करणे आणि आरोपींना लपविण्याचे गंभीर आरोप आहेत.

त्यामुळे आरोपींना जामिनावर सोडल्यास साक्षीदारांवर दबाव येण्याची किंवा पुराव्यात छेडछाड होण्याची शक्यता नाकारता येत नाही. पीडितेच्या हक्कासोबत समाजहितही लक्षात घेणे आवश्यक असून, आरोपींना जामीन दिल्यास समाजहिताला बाधा येऊ शकते, अशी गंभीर निरीक्षणे नोंदवित अतिरिक्त सत्र न्यायाधीश के. पी. क्षीरसागर यांनी हा आदेश दिला.वैष्णवीची सासू लता राजेंद्र हगवणे (वय ५४), नणंद करिश्मा राजेंद्र हगवणे (वय २१, दोघी रा. भुकूम, मुळशी) आणि नीलेश रामचंद्र चव्हाण (वय ३५, रा. कर्वेनगर) अशी जामीन फेटाळलेल्या आरोपींची नावे आहेत.

हुंडा व जमीन खरेदी करण्यासाठी सासरी होणाऱ्या शारीरिक व मानसिक छळाला कंटाळून वैष्णवी शशांक हगवणे (वय २४, रा. मुक्ताई गार्डनजवळ, भुकूम, मुळशी) हिने १६ मे रोजी राहत्या घरात गळफास घेत आत्महत्या केली.आरोपींविरोधात एकूण १६७० पानांचे आरोपपत्र दाखल आहे. तिघांनी ऍड. विपुल दुशिंग यांच्यामार्फत न्यायालयात जामिनासाठी अर्ज केला. त्याला विशेष सरकारी वकील उज्ज्वला पवार आणि तक्रारदारांचे वकील ऍड. शिवम निंबाळकर यांनी विरोध केला.