प्रभात वृत्तसेवा
पुणे – व्यवसायाचा विस्तार करण्यासाठी कर्ज मिळवून देतो, असे आमिष दाखवत शहरातील व्यापाऱ्याची तब्बल ८९ लाख १३ हजार रुपयांची फसवणूक केल्याची धक्कादायक घटना उघडकीस आली आहे. या प्रकरणी पर्वती पोलीस ठाण्यात सीए सिद्धार्थ जयराम गावडे, पंढरीनाथ बाळासाहेब साबळे, विकास दामोदर खुडे, प्रतिमा रामचंद्र गिते यांच्यासह इतरांविरुद्ध गुन्हा दाखल करण्यात आला आहे.

फिर्यादी रोशन पवनकुमार बाहेती (३३, रा. आंबेगाव, पुणे, मूळ, हिंगोली) यांनी दिलेल्या तक्रारीनुसार, पत्नीच्या नावे असलेल्या ‘समर्थ फूड्स’ या आटा व्यवसायाच्या विस्तारासाठी मोठ्या प्रमाणावर कर्ज घेण्याची गरज होती. या दरम्यान ओळखीतील पंढरीनाथ साबळे याने कर्ज मंजुरीसाठी सीए सिद्धार्थ गावडे व लोन एजंट विकास खुडे यांच्याशी संपर्क करून दिला.

या आरोपींनी फिर्यादीकडून सीडबी बँकेकडून ७ कोटी ४० लाख रुपयांचे कर्ज मंजूर करून देतो असे सांगत वेळोवेळी विविध खात्यांमध्ये ऑनलाइन व्यवहार, रोख व फोन पे द्वारे एकूण ८९ लाख १३ हजार रुपये घेतले. मात्र, प्रत्यक्षात कर्ज मंजूर झाले नाही. तसेच घेतलेले पैसे परत केले नाहीत. या प्रकारामुळे बाहेती यांनी पोलिसांत धाव घेतली. आरोपींनी संगनमत करून विश्वास संपादन केला व आर्थिक अपहार केला, असे फिर्यादीने तक्रारीत नमूद केले आहे.