Fraud Case – पाण्याच्या बॉटलिंग प्लॅन्टमध्ये भागीदारीच्या नावाखाली तब्बल 2 कोटी 34 लाख रुपयांची फसवणूक झाल्याचा धक्कादायक प्रकार लोणी काळभोर (ता. हवेली) परिसरात उघडकीस आला आहे. विशेष म्हणजे ही फसवणूक नातेवाईकांनीच केल्याने प्रकरण अधिकच गंभीर बनले असून पोलिसांनी तिघांविरुद्ध गुन्हा दाखल केला आहे. प्रतिक राजेश काबरा, रोहित राजेश काबरा आणि राजेश सत्यनारायण काबरा (रा. हडपसर) अशी आरोपींची नावे असून, याप्रकरणी व्यावसायिक आनंद मदनलाल लाहोटी यांनी लोणी काळभोर पोलीस ठाण्यात फिर्याद दिली आहे. फिर्यादी लाहोटी हे हडपसर परिसरात पेट्रोल पंप व क्रीडा अकॅडमी चालवतात. नोव्हेंबर 2024 मध्ये प्रतिक काबरा यांनी पाण्याच्या बॉटलिंग व्यवसायात 40 ते 50 टक्के नफा मिळतो असे आमिष दाखवत भागीदारीचा प्रस्ताव दिला. विश्वास ठेवून लाहोटी यांनी सुरुवातीला कदमवाकवस्ती येथे पॅकेजिंग व्यवसायासाठी 3 लाख रुपये गुंतवले. सुरुवातीला नफा दिसू लागल्याने आरोपींनी स्वतःचा प्लॅन्ट उभारण्याचा प्रस्ताव मांडला. त्यानुसार 17 फेब्रुवारी 2025 रोजी ‘ए.पी. बेव्हरेजेस’ या नावाने भागीदारी फर्म स्थापन करण्यात आली. यात लाहोटी व प्रतिक काबरा हे 50-50 टक्के भागीदार होते, तर उर्वरित आरोपींना व्यवस्थापनाची जबाबदारी देण्यात आली. यानंतर प्लॅन्ट उभारणी, यंत्रसामग्री, कच्चा माल व परवान्यांसाठी फिर्यादींकडून वेळोवेळी मोठ्या रकमा उकळण्यात आल्या. बँक व्यवहार व रोख स्वरूपात घेतलेल्या रकमांचा एकूण आकडा 2 कोटी 34 लाख 23 हजार रुपयांपर्यंत पोहोचला. जून ते ऑक्टोबर 2025 दरम्यान प्लॅन्टमधून रोज सुमारे 3 हजार बॉक्स उत्पादन होत होते. फसवणूक या काळात सुमारे 60 लाख रुपयांची उलाढाल झाली; मात्र फर्मच्या खात्यात केवळ 5.19 लाख रुपये जमा झाले, उर्वरित रक्कम आरोपींनी स्वतःच्या खात्यात वळविल्याचे उघड झाले. हिशेब मागितल्यानंतर आरोपींकडून टाळाटाळ सुरू झाली. अखेर नोव्हेंबर 2025 मध्ये लाहोटी यांनी भागीदारी संपवून गुंतवणूक परत मागितली. त्यावेळी मशिनरी विक्री करून पैसे देतो असे सांगण्यात आले. मात्र ऑक्टोबर 2025 मध्ये प्लॅन्टवरील सर्व यंत्रसामग्री गायब असल्याचे उघड झाले. चौकशीत ती सुमारे 60 लाखांना विकल्याचे सांगण्यात आले, परंतु त्या पैशांचाही हिशोब देण्यात आला नाही. जानेवारी 2026 मध्ये मशीन विक्रीसंदर्भात सोलापूर येथे वाद झाल्यानंतर पोलिसांना पाचारण करण्यात आले. तसेच कुरकुंभ येथे ट्रकमधील मशीन दुसर्या वाहनात हलविल्याचा व्हिडिओही समोर आला आहे. फिर्यादींच्या गुंतवणुकीतून खरेदी केलेली ब्लोइंग मशीन, फिलर, लेबलर, श्रिंक मशीन, कॉम्प्रेसर, आरओ प्लॅन्ट आदी उपकरणे परवानगीशिवाय विकल्याचा आरोप आहे. या प्रकरणामुळे स्थानिक उद्योगविश्वात मोठी खळबळ उडाली असून, नातेवाईकांच्या विश्वासावर केलेली गुंतवणूक किती धोकादायक ठरू शकते, याचे हे उदाहरण मानले जात आहे. पुढील तपास लोणी काळभोर पोलीस करीत आहेत.
