प्रभात वृत्तसेवा पुणे – पूर्ववैमनस्नयातून तरुणावर तीक्ष्ण शस्त्राने वार करून खुनाचा प्रयत्न करण्यात आल्याची घटना एनडीए रस्त्यावरील उत्तमनगर भागात घडली. टोळक्याने तीक्ष्ण शस्त्रे उगारून परिसरात दहशत माजविली. या प्रकरणी उत्तमनगर पोलिसांनी दोघांना अटक केली असून, साथीदारांविरुद्ध गुन्हा दाखल करण्यात आला आहे.प्रथमेश चिंटू आढळ (१९, रा. साई निवास, कोंढेवे-धावडे) असे गंभीर जखमी झालेल्याचे नाव आहे. या प्रकरणी करणसिंह गचंड, अमनसिंह गचंड यांना अटक करण्यात आली आहे. त्यांच्याबरोबर असलेल्या साथीदारांविरुद्ध गुन्हा दाखल करण्यात आला आहे. आरोपी गचंड याच्याशी आढळ याचा वाद झाला होता.आढळ हा रात्री आठच्या सुमारास तो उत्तमनगर परिसरातून निघाला होता. आरोपी गचंड आणि साथीदारांनी त्याला अडवत, तू आम्हाला का भेटत नाही? अशी विचारणा करून शिवीगाळ करीत तीक्ष्ण शस्त्राने वार केले. त्यानंतर आम्ही या भागातील भाई आहोत, आमच्या नादाला नाही लागायचे, असे म्हणत आरोपींनी शस्त्रे उगारून परिसरात दहशत माजविली. पसार झालेल्या आरोपींना पोलिसांनी अटक केली असून, साथीदारांचा शोध घेण्यात येत आहे. पोलीस उपनिरीक्षक बिनवडे पुढील तपास करीत आहेत.
