Pune crime : भटक्या कुत्र्यांकडे अनेकदा उपद्रव म्हणून पाहिले जाते. मात्र, याच भटक्या कुत्र्यांचे भुंकणे, त्यांचे विव्हळणे आणि मध्यरात्रीच्या शांततेत घुमलेला चारचाकी वाहनाच्या टायरचा आवाज एका गंभीर गुन्ह्याचा महत्त्वाचा धागा ठरला. कात्रज-कोंढवा रस्त्यावरील गुजरवस्ती, शेलार मळा परिसरात झालेल्या सशस्त्र दरोड्याचा प्रकार प्राणिमित्र संस्थेच्या सीसीटीव्ही फुटेजमुळे समोर आला. त्यामुळे मुक्या प्राण्यांची सतर्कता माणसांच्या मदतीला कशी धावून येऊ शकते, याची चर्चा परिसरात रंगली आहे.

सोमवारी, १३ ऑक्टोबर रोजी पहाटे सुमारे २.४० वाजण्याच्या सुमारास हा प्रकार घडला. नेहमी वर्दळ असलेल्या या परिसरातील समोरासमोरच्या इमारतींमधील दोन बंद सदनिकांचे दरवाजे तोडून चोरट्यांनी सोने आणि रोख रक्कम चोरून नेली. सकाळी हा प्रकार उघडकीस आल्यानंतर रहिवाशांना धक्का बसला. विशेष म्हणजे, इमारतीतील सदनिकांचे दरवाजे बाहेरून बंद करण्यात आले होते. त्यामुळे रहिवाशांना बाहेर पडण्यातही अडचणी आल्या.

परिसरात सीसीटीव्ही कॅमेरे नसल्याने चोरी नेमकी कधी आणि कशी झाली, याचा शोध घेणे आव्हानात्मक होते. मात्र, परिसरातील भटक्या प्राण्यांना नियमित खाद्य आणि पाणी देणाऱ्या ‘प्राणिमात्र ॲनिमल वेल्फेअर’ संस्थेच्या आवारात सुरक्षेच्या कारणास्तव सीसीटीव्ही कॅमेरे बसविण्यात आले होते. याच कॅमेऱ्यांमधील फुटेज तपासताना मध्यरात्रीच्या हालचालींचे महत्त्वाचे धागेदोरे मिळाले.

कुत्र्यांचे भुंकणे अन् टायरच्या आवाजाने संशय बळावला –

रात्रीच्या किर्र अंधारात परिसरातील कुत्र्यांचे भुंकणे आणि विव्हळणे, तसेच चारचाकी वाहनाचा ब्रेक लावताना टायरचा जमिनीशी घर्षण होऊन निर्माण झालेला आवाज, या बाबी तपासासाठी महत्त्वाच्या ठरल्या. रात्री उशिरापर्यंत जागे असलेल्या काही नागरिकांच्या निरीक्षणांसह संस्थेच्या सीसीटीव्ही फुटेजची पडताळणी करण्यात आली. त्यातून हा केवळ साधा चोरीचा प्रकार नसून सशस्त्र दरोडा असल्याचे समोर आल्याचे सांगण्यात आले.

या दरोड्यात १८ ते २५ वयोगटातील चार ते पाच जणांचा सहभाग असल्याची माहिती पुढे आली आहे. त्यामुळे परिसरात खळबळ उडाली आहे. सीसीटीव्ही फुटेज संस्थेच्या वतीने पोलिसांच्या स्वाधीन करण्यात आले असून, त्याआधारे पुढील तपास केला जाणार आहे.

मुक्या प्राण्यांची सतर्कता आली माणसांच्या मदतीला-

‘प्राणिमात्र ॲनिमल वेल्फेअर’ संस्थेकडून परिसरातील भटक्या प्राण्यांना दररोज खाद्य दिले जाते. त्यांच्या पिण्याच्या पाण्याची व्यवस्था केली जाते, तसेच त्यांना निवांत बसण्यासाठीही जागा उपलब्ध करून दिली जाते. या प्राण्यांच्या सुरक्षिततेसाठी बसविण्यात आलेले सीसीटीव्ही कॅमेरे आता गुन्ह्याच्या तपासासाठी उपयुक्त ठरले आहेत.

भटक्या कुत्र्यांकडे अनेकदा केवळ त्रासदायक प्राणी म्हणून पाहिले जाते. मात्र, रात्रीच्या वेळी त्यांच्या भुंकण्याने निर्माण झालेली सतर्कता आणि प्राणिमित्र संस्थेने केलेली सुरक्षिततेची व्यवस्था यामुळे दरोड्याच्या तपासाला दिशा मिळाली. त्यामुळे ‘मुक्या प्राण्यांचे भुंकणेही गुन्हेगारांचा माग काढण्यासाठी महत्त्वाचा धागा ठरू शकते,’ याची प्रचिती या घटनेतून आली आहे.