Pune Court- कौटुंबिक हिंसाचाराचा खटला दाखल करणाऱ्या अर्जदार महिलेच्या लग्नापूर्वीच विवाहित असलेल्या नणंदेला गुन्ह्यातून वगळण्यात आले आहे. नणंद तिच्या लग्नापासून सासरी राहत आहे. ती माहेरी राहत असल्याचा कोणताही ठोस पुरावा नाही. तसेच, तिच्यावर सामान्य स्वरूपाचे आरोप असून, गंभीर आरोप नसल्याचा निष्कर्ष काढत प्रथमवर्ग न्यायदंडाधिकारी दीप्ती पाटील यांनी हा आदेश दिला.

नणंदेसह पती, सासू-सासऱ्याचा वतीने ॲड. अमित राठी आणि ॲड. अविनाश पवार यांनी न्यायालयात बाजू मांडली. त्यांना ॲड. पूनम मावाणी, ॲड. आदित्य जाधव आणि ॲड. प्राची जोग यांनी सहकार्य केले. जगदीश आणि उमा (नावे बदलली आहेत) पती-पत्नी असून, दोघेही उच्चशिक्षित आहे. पतीसह सासरच्यांसोबत मतभेद टोकापर्यंत गेले. त्यानंतर उमा माहेरी निघून गेली. तिने जुलै २०२४ मध्ये पती,

सासू-सासरे आणि विवाहित नणंदेच्या विरुद्ध कौटुंबिक हिंसाचारापासून महिलांचे संरक्षण कायदा २००४ च्या अंतर्गत येथील न्यायालयात खटला दाखल केला. न्यायालयाची नोटीस मिळाल्यानंतर पतीसह सर्वजण ॲड.अमित राठी यांच्यामार्फत न्यायालयात हजर झाले. विवाहित नणंदेच्या वतीने खटल्यातून आरोपमुक्त करून वगळण्यात यावे, असा अर्ज दाखल करण्यात आला.

यास अर्जदार विवाहितेच्या वतीने कडाडून विरोध करण्यात आला. त्या विवाहितेचे भावासोबत लग्न होण्यापूर्वीच नणंदेचे लग्न झाले आहे. ती सासरी राहत आहे. तसेच, खटल्यात तिच्या विरोधात केवळ मोघम स्वरूपाचे आरोप आहेत. त्यामुळे तिला दाव्यातून वगळण्याची मागणी बचाव पक्षाने केली. दोन्ही बाजूंचा युक्तिवाद ऐकल्यानंतर न्यायालयाने वरील निकाल दिला.

“अर्जदार महिलेच्या लग्नापूर्वीच नणंदेचे लग्न झाले आहे. नणंदेच्या विरोधात कोणताही ठोस पुरावा नसल्याचे न्यायालयाच्या निदर्शनास आणून दिले. त्यानुसार न्यायालयाने हा निकाल दिला. महिला पक्षकाराला न्याय मिळवून दिल्याचा आनंद वाटत आहे.”
– ॲड. अमित राठी, नणंदेचे वकील