Dowry Harassment – माहेरहून एक लाख रुपये हुंडा आणण्याच्या मागणीवरून झालेल्या शारीरिक व मानसिक छळास कंटाळून २१ वर्षीय गर्भवती विवाहितेने आत्महत्या केल्याची धक्कादायक घटना घडली आहे. या प्रकरणी मयत विवाहितेच्या पतीसह तिघांवर गुन्हा दाखल करण्यात आला असून, पती आणि सासऱ्याला इंदापूर पोलिसांनी अटक केली आहे. सोनाली समाधान चंदनशिवे (वय २१, रा. वडापुरी, ता. इंदापूर) असे मृत विवाहितेचे नाव आहे.

या प्रकरणी तिचे वडील हनुमंत श्रीपती बनसोडे (वय ४५, रा. कन्हेरगाव, ता. माढा, जि. सोलापूर) यांनी इंदापूर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, सोनाली हिच्याकडे माहेरहून १ लाख रुपये आणण्यासाठी पती समाधान उर्फ कार्तिक गौतम चंदनशिवे, सासू पार्वती गौतम चंदनशिवे आणि सासरा गौतम नामदेव चंदनशिवे (सर्व रा. वडापुरी, ता. इंदापूर) यांनी वेळोवेळी शारीरिक व मानसिक छळ केला.

सोनाली पाच महिन्यांची गर्भवती असतानाही तिचा छळ सुरूच होता. अखेर या त्रासाला कंटाळून तिने आत्महत्येसारखे टोकाचे पाऊल उचलल्याचे फिर्यादीत नमूद करण्यात आले आहे. वडीलांच्या फिर्यादीवरून इंदापूर पोलीस ठाण्यात संशयितांविरुद्ध ‘भारतीय न्याय संहिता’ अन्वये गुन्हा दाखल करण्यात आला आहे.

गुन्हा दाखल होताच इंदापूर पोलिसांनी तातडीने कारवाई करत मयत सोनालीचा पती समाधान उर्फ कार्तिक चंदनशिवे आणि सासरा गौतम चंदनशिवे या दोघांना अटक केली आहे. इंदापूर पोलीस ठाण्याचे पोलीस निरीक्षक विलास नाळे यांच्या मार्गदर्शनाखाली पोलीस उपनिरीक्षक सुरवसे यांनी गुन्हा दाखल केला असून, पुढील तपास पोलीस उपनिरीक्षक कोल्हे करत आहेत.