Abhishek Banerjee : तृणमूल कॉंग्रेसचे खासदार अभिषेक बॅनर्जी यांना डोळ्यावरील उपचारांसाठी परदेशी जाण्यास कलकत्ता उच्च न्यायालयाने परवानगी नाकारली. त्या आदेशाविरोधात अभिषेक यांनी सर्वोच्च न्यायालयात धाव घेतली.

पश्‍चिम बंगालमध्ये काही महिन्यांपूर्वी विधानसभा निवडणूक झाली. त्या निवडणुकीसाठीच्या प्रचार सभेत तृणमूलच्या प्रमुख ममता बॅनर्जींचे भाचे अभिषेक यांनी प्रतिस्पर्धी पक्षाच्या नेत्यांविरोधात प्रक्षोभक वक्तव्ये केल्याचा आरोप आहे. त्यावरून त्यांच्या विरोधात गुन्हा दाखल करण्यात आला.

त्या प्रकरणाचा तपास प्रलंबित असल्याने उच्च न्यायालयाने अभिषेक यांना परदेशी जाण्याची परवानगी नाकारली. कोलकत्यात डोळ्यांवर प्रभावीपणे उपचार करणारी रूग्णालये असल्याचेही उच्च न्यायालयाने नमूद केले. आता त्या आदेशाला आव्हान देणारी याचिका अभिषेक यांनी सर्वोच्च न्यायालयात दाखल केली आहे.