Pune Census – जनगणना २०२७ च्या सर्वेक्षणाबाबत समाजमाध्यमांवर सध्या दिशाभूल करणारे व्हिडिओ व्हायरल होत असून, नागरिकांनी यावर विश्वास ठेवू नये, असे आवाहन महापालिकेने केले आहे. जनगणनेचे काम पूर्णपणे पारदर्शक, डिजिटल पद्धतीने सुरू असून याबाबतच्या अपप्रचाराला, अफवांना बळी पडू नये, असेही प्रशासनाने स्पष्ट केले आहे. काही शालेय विद्यार्थिनी हातात फॉर्म आणि कागदपत्रे घेऊन घराघरांमध्ये जनगणना करत असल्याचा व्हिडिओ समाजमाध्यमांवर जोरदार व्हायरल होत आहे.

हा व्हिडिओ पूर्णपणे चुकीचा, नागरिकांत संभ्रम निर्माण करणारा असल्याचे पालिकेने स्पष्ट केले आहे. अशा कोणत्याही शालेय विद्यार्थिनींमार्फत किंवा कागदपत्रे गोळा करून ऑफलाईन कोणतेही सर्वेक्षण केले जात नसल्याचेही पालिकेने स्पष्ट केले आहे. पालिकेच्या माहितीनुसार, जनगणना २०२७ च्या पहिल्या टप्प्यातील कामाला १६ मे २०२६ पासून सुरुवात झाली असून, ते १४ जून २०२६ पर्यंत चालणार आहे.

हे संपूर्ण सर्वेक्षण पालिकेने नियुक्त केलेल्या अधिकृत प्रगणक शिक्षिकांमार्फतच केले जात आहे. यासाठी कोणत्याही कागदी फॉर्मचा वापर न करता, प्रगणक आणि पर्यवेक्षकांच्या माध्यमातून मोबाइलवरील अधिकृत एचएलओ अ‍ॅपद्वारे ऑनलाइन नोंदी केल्या जात आहेत. एका भागात एकूण १६४ घरांपैकी तब्बल १४० घरांचे सर्वेक्षण एचएलओ अ‍ॅपवर पूर्ण केले आहे. यावरून ही प्रक्रिया, सुरक्षितपणे डिजिटल स्वरूपात राबविली जात असल्याचे स्पष्ट होते.

ओळखपत्र तपासा, सहकार्य करा
आपल्या घरी येणार्‍या प्रगणकांचे ओळखपत्र नक्की तपासा. खात्री पटल्यानंतरच त्यांना योग्य ती माहिती द्यावी. घरांच्या यादीचे सर्वेक्षण करण्यासाठी येणार्‍या कर्मचार्‍यांना सहकार्य करावे. अचूक जनगणना, सक्षम भारत हा संदेश देत पालिकेने नागरिकांना या राष्ट्रीय कार्यात सहभागी होण्याचे आणि अफवा पसरवण्यापासून दूर राहण्याचे आवाहन केले आहे.