Pune: कर्वेनगर येथील मेघराज सोसायटीसमोर झाडांच्या वाढलेल्या फांद्या कापण्यासाठी लावलेल्या जाड दोरखंडात अडकून दुचाकीस्वारांचा अपघात होऊन गंभीर जखमी झालेल्या रामेश्वर अवतीकर या तरुणाची महापौर मंजूषा दीपक नागपूरे यांनी दीनानाथ मंगेशकर रुग्णालयात भेट घेतली. या वेळी त्यांनी रुग्णाच्या प्रकृतीची माहिती घेतली तसेच उपचार करणाऱ्या डॉक्टरांशी चर्चा करून पुढील उपचाराबाबत सविस्तर जाणून घेतले. कर्वेनगर परिसरातील एका सोसायटीत झाडांच्या वाढलेल्या फांद्या तोडण्याचे काम सुरू होते. यासाठी रस्त्यावरून जाणाऱ्या वाहनचालकांच्या लक्षात येईल, अशी पुरेशी सुरक्षा व्यवस्था न करता जाड दोरखंड लावण्यात आला होता. बुधवारी दुपारी दुचाकीवरून येणाऱ्या दोन जणांचा या दोरखंडात अडकून अपघात झाला. या अपघातात दुचाकी चालविणाऱ्या रामेश्वर अवतीकर यांचा गळा गंभीररीत्या चिरला गेला, तर मणक्यालाही मार बसला. त्यांना तातडीने दीनानाथ मंगेशकर रुग्णालयात दाखल करण्यात आले. रुग्णालयातील डॉक्टरांनी महापौरांना रुग्णाची सध्याची प्रकृती स्थिर असल्याचे सांगून त्याच्यावर सुरू असलेल्या उपचारांची माहिती दिली. आवश्यक त्या शस्त्रक्रिया आणि पुढील उपचारांची तयारी करण्यात आली असून, तज्ज्ञ डॉक्टरांचे पथक त्याच्यावर लक्ष ठेवून असल्याचेही त्यांनी स्पष्ट केले. महापौर नागपूरे यांनी रुग्णाच्या नातेवाईकांशी संवाद साधून त्यांना धीर दिला. तसेच, उपचारासाठी आवश्यक ती सर्व मदत विविध माध्यमातून उपलब्ध करून देण्याचे आश्वासन दिले. भविष्यात अशा प्रकारच्या घटना घडू नयेत, यासाठी झाडे तोडताना व रस्त्यावर काम करताना योग्य ती खबरदारी घेण्याच्या सूचना संबंधित विभागांना देण्यात येतील, असेही त्यांनी सांगितले. हेही वाचा – Todays Top 10 News: पार्थ पवार यांचा राज्यसभा प्रवेश निश्चित? ते महाराष्ट्रात भूकंपाचे धक्के, वाचा आजच्या टाॅप बातम्या
