Pune Accident – पुणे-सातारा महामार्गावर हरिश्चंद्री (ता. भोर) गावच्या हद्दीत शुक्रवारी (दि. २०) मध्यरात्री एकच्या सुमारास भीषण अपघात झाला. भरधाव वेगातील टेम्पोने रस्ता दुभाजक ओलांडून समोरून येणाऱ्या ट्रकला जोरदार धडक दिली. या अपघातात टेम्पोमधील एका १९ वर्षीय तरुणाचा जागीच मृत्यू झाला, तर अन्य तिघे गंभीर जखमी झाले आहेत. मिळालेल्या माहितीनुसार, श्रेयस बाळू साळवे (वय १९, रा. धावडवाडी, ता. खंडाळा) असे मृताचे नाव आहे. सातारा बाजूकडे जाणारा टेम्पो (एम.एच. १२ जेएफ ५३६४) चालक अक्षय सकटे याने भरधाव वेगात आणि निष्काळजीपणे चालवल्याने तो दुभाजक ओलांडून विरुद्ध दिशेच्या लेनवर गेला. यावेळी समोरून येणाऱ्या ट्रकला (एमपी ०९ एएल ९३०८) टेम्पोने जोरदार धडक दिली. या धडकेत टेम्पो चालक अक्षय सकटे (वय २९, रा. धनगरवाडी, ता. खंडाळा), ट्रक चालक फरीद महंमद आणि क्लिनर इकरार रमजान महंमद (दोघेही रा. आलापूर, उत्तर प्रदेश) हे तिघे जखमी झाले आहेत. याप्रकरणी ट्रक क्लिनर इकरार महंमद याने राजगड पोलीस ठाण्यात फिर्याद दिली आहे. घटनेचा पुढील तपास राजगड पोलीस करत आहेत.
